Menu
Indimi

Icyorezo COVID-19

Amerika Yahaye U Rwanda Izindi Nkingo 418,860 Za Pfizer

Yanditswe kuwa

Leta zunze ubumwe z’Amerika zibinyujije mu Kigega cy’Abanyamerika gishinzwe iterambere mpuzamahanga, USAID, zahaye u Rwanda inkingo za Pfizer zigera ku 418,860.

Uyu mubare watumye inkingo zose Amerika imaze guha u Rwanda zingana na 1,658,690.

Mu mpera za Nzeri, 2021, Ambasade ya Leta zunze ubumwe za Amerika mu Rwanda zahaye u Rwanda inkingo 751,140 za COVID-19 zo mu bwoko bwa Pfizer, zatanzwe nk’impano.

Ni icyiciro cya kabiri cy’inkingo Amerika izaba ihaye u Rwanda, k’uburyo zose hamwe zizahita ziba inkingo 1,239,830.

Mu kwezi gushize icyo gihugu cyahaye u Rwanda inkingo 488,370 za Pfizer, zirimo 188,730 zigize igice cy’inkingo Amerika yemereye mu nama ya G-7 ko izagurira ibihugu bitandukanye, n’izindi 300,000 zavuye ku nkingo icyo gihugu gifite, cyiyemeje gusaranganya ibihugu bizikeneye cyane.

Ambasaderi wa Amerika mu Rwanda Peter H. Vrooman, yavuze ko igihugu cye “kirimo gusaranganya izi nkingo za COVID-19 mu gutabara ubuzima no kuba ku isonga ku isi mu gushyira iherezo kuri iki cyorezo.”

Yavuze ko Perezida Joe Biden yiyemeje ko imbaraga zakoreshejwe mu guhangana n’icyorezo imbere mu gihugu zigiye no gushyirwa ku rwego mpuzamahanga.

Muri Kamena Biden yatangaje ko Amerika ifite ubushake bwo kugura inkingo zigera muri miliyoni 500 za Pfizer zizagenerwa ibihugu bigera mu 100, mu kubyunganira mu guhangana na COVID-19 binyuze muri gahunda y’ikingira.

Ku wa 22 Nzeri yatangaje igurwa ry’izindi nkingo miliyoni 500 za Pfizer, k’uburyo igihugu cye kizaba kimaze gutanga inkingo miliyari 1.1 bitarenze umwaka wa 2022.

Iyi ni inkunga ikomeye u Rwanda rubonye, nyuma y’uko rumaze gukingira abantu barenga miliyoni 1.6 bakingiwe byuzuye na miliyoni 2.1 bahawe urukingo rwa mbere.

Izi nkingo za Amerika ubwazo zishobora gukingira byuzuye abantu 375,570, kuko inkingo za Pfizer zisaba ko umuntu ahabwa ebyiri.

Tanga igitekerezo

Tanga igitekerezo

Your email address will not be published. Required fields are marked *

Advertisement

English Version

Advertisement
WeCreativez WhatsApp Support
Mutwandikire turabasubiza
Twandikire