Victor Mbaoma wa APR FC  yaraye atindiye ikipe ye igitego mu mukino yakinaga na Singida Black Stars. Wari umukino wa mbere  APR FC yari itangiye muri CECAFA Kagame Cup 2024.

CECAFA Kagame Cup  2024 izarangira taliki 21, Nyakanga, 2024, ikaba iri kubera i Dar es Salaam muri Tanzania.

APR FC ni imwe mu makipe 12 ari muri iri rushanwa, ikaba yaraye itsinze Singida Black Stars yo muri Tanzania igitego 1-0.

Ku munota wa 20 nibwo iki gitego kinjiwe na Victor Mbaoma ku mupira mwiza yahawe na Niyibizi Ramadhan.

Igice cya mbere cy’uyu mukino cyarangiye Singida idashoboye kwishyura ndetse no mu gice cya kabiri biba uko.

Umukino wose ndetse warangiye itishyuye nubwo yakoraga uko ishoboye ngo ibikore.

Singida Big Stars yahushije ibitego kenshi bitewe no guhusha ba rutihizamu bayo ntibaboneze mu izamu neza.

Ugenekereje yahushije amashoti umunani yanyuze iruhande rw’izamu.

Abashinzwe kurinda ko umupira ugera mu izamu rya APR bakomeje kubera abakinnyi ba Singida ibamba, birangira ndetse ikipe yabo itahanye amanota atatu.

Umutoza wa APR FC witwa Darko Novic yakinishije abakinnyi basanzwe bamenyereye ikibuga yirinda gushyiramo abashyashya kuko urebye abashya yakinishije ari Muzungu na Byiringiro Gilbert bonyine.

Abakinnyi 11 APR FC yabanje mu kibuga ni Pavelh Ndzila, Niyigena Clément, Nshimiyimana Yunusu, Byiringiro Gilbert, Niyomugabo Claude (C), Taddeo Lwanga, Ruboneka Jean Bosco, Niyibizi Ramadhan, Dushimimana Olivier ‘Muzungu’, Mugisha Gilbert na Victor Mbaoma.

APR FC izakina umukino wa kabiri mu itsinda ku wa Gatanu tariki ya 12 Nyakanga mu mukino uzayihuza na  El Merreikh Bentiu.