Umuyobozi wa National Unity Platform (NUP), Robert Kyagulanyi wamenyekanye nka Bobi Wine, yatawe muri yombi na Polisi ya Uganda ubwo yari mu myigaragambyo yamagana ibura ry’abarwanashyaka be.
Ni abantu avuga ko bagiye batabwa muri yombi mu bikorwa bijyanye n’amatora ya perezida yabaye ku wa 14 Gashyantare, yegukanywe na Yoweri Museveni. Ni amatora ariko Bobi Wine yavuze ko yibwe amajwi ku buryo bukomeye.
Bobi Wine yafatiwe ahazwi nka City Square mu murwa mukuru Kampala.
Yafashwe nyuma y’uko mu kiganiro yagiranye n’itangazamakuru ku mugoroba wo kuri iki cyumweru, Perezida Museveni yavuze ko itsinda rya Kyagulanyi ryakoze uburiganya mu matora rifashijwe n’abantu bamwe bamunzwe na ruswa.
Yakomeje ati “Bakomeje gutegura ko bazitambika ibikorwa byo kurahira kwa perezida. Ntabwo bazabishobora. Bapanga ibintu byinshi bikabije birimo no kwica abantu bamwe babo batavuga rumwe n’ubutegetsi, kugira ngo bavuge ko ari guverinoma [yabikoze]”
Nubwo Bobi Wine yavugaga ko arimo guhamagarira abantu imyigaragambyo yo u ituze, Minisitiri w’umutekano Gen Elly Tumwine yavuze ko bashaka kuyitwaza ngo bateze akaduruvayo mu gihugu.
NUP iheruka kwandikira inteko ishinga amategeko ivuga hari abarwanashyaka 680 baburiwe irengero. Yavugaga ko bishwe, bafunzwe cyangwa se aho baherereye hatazwi.
Nyuma guverinoma yakoze urutonde rw’abantu 177, izo ntonde zombi ziza guhuriza ku bantu 71.
