Abaganga bavuga ko cancer y’ibere ari ikibazo gikomereye Abanyarwandakazi, bagasabwa kwisuzimisha igihe cyose bumvise ko mu ibere harimo akabyimba ariko kataryana.

Ako kabyimba wakwita ‘akabuye’ ni kimwe mu bimenyetso bikomeye bikwiye gushingirwaho n’umugore cyangwa umukobwa uwo ari we wese ngo atangire kwisuzimisha cancer y’ibere.

Mu nama yahuje abaganga n’abaforomo ku kibazo cya cancer y’ibere yabereye i Kigali kuri uyu wa Gatandatu taliki 02, Ugushyingo, 2024 hatangarijwemo ko Abanyarwandakazi 740 ari bo babaruwe ko barwaye iyi cancer mu mwaka wa 2023.

Umwe mu barwaye cancer ariko akavurwa ubu akaba ameze neza witwa Ancille avuga yivurije henshi, aza koroherwa, agashima Leta y’u Rwanda ko yashyizeho n’ibitaro bya Butaro mu Karere ka Burera ngo byite ku barwayi ba cancer.

Avuga ko ubwo yageraga kwa muganga, bamukase ‘utunyama tune’ batwohereza kwa muganga.

Ubwo bamuhamagaraga bamubwiye ko agiye guca mu bindi byuma, biza kurangira bigaragaye ko arwaye cancer y’ibere.

Ati: “Ubu bambaze ibere ry’ubumoso ahari umutima, ariko ubu meze neza kubera ko muganga yankurikiranye, kugeza ubu meze neza”.

Uyu mubyeyi yabyaye abana umunani ariko bane nibo bakiri ho.

Yabagiwe i Nyamata.

Cancer y’ibere si ikibazo mu Rwanda gusa kuko n’abagore b’ahandi bahura nayo.

Iterwa n’imihindagurikire y’imikorere y’uturemangingo tugize ibere, tugatangira gukora mu kajagari.

Iyo mikorere niyo abahanga bita cancer.

Si ku ibere gusa iki kibazo gikunze kugaragaramo kuko n’izindi cancer zitera zityo.

Gukora gutyo bituma mu ibere hirema akabyimba gashobora no gutangirira ku moko.

Ni akabyimba gakura kakaviramo umugore ikibazo cy’ubuzima gifata ibere, abaganga bita cancer y’ibere.

Iyi mikorere idasanzwe irakura igakwira mu ibere rikangirika.

Inama ihabwa abagore ni ugutabara hakiri kare bakajya kwisuzumisha no kwivuza kugira ngo habeho gukumira ko ikwirakwira rya kiriya kibazo rigera kure.

Iyo yamaze kugaragara, icyo gihe ibintu biba bikomeye ku buryo ikiba gikwiye ari ukuvura umurwayi.

Ibyo nabyo ntibyoroshye kuko akenshi bisaba ko umugore abagwa ibere, cyangwa hagakoreshwa uburyo bwo gushiririza ibere( radiation) kugira ngo twa turemangango fatizo tudakwiragira.

Imiti ihabwa abarwayi ibatera ibibazo kuko iba ifite imbaraga, akenshi bigatuma umusatsi w’umuntu upfuka, ukaba wagira ngo arawogosha.

Ishami ry’Umuryango w’Abibumbye rishinzwe ubuzima, WHO/OMS, rivuga ko mu mwaka wa 2022  abagore bangana na miliyoni 2.3 barwaye iyi cancer kandi muri bo  670,000 irabica.

Ni indwara ifata abagore bo mu byiciro byose by’ubuzima n’iby’imyaka y’ubukure ariko ikibasira abageze mu gihe cyo gucura, bakuze.

Abahanga bavuga ko, ku rundi ruhande, byagaragaye ko mu bihugu bikize, umugore umwe mu bagore 12 aba afite ibyago byo kurwara cancer y’ibere.

Ni abagore bo mu bihugu byateye imbere, bifite umusaruro mu bukungu uri hejuru cyane bita High Human Development Index (HDI).

Muri ibyo bihugu umwe mu bagore 71 ahitanwa n’iyo cancer.

Ku rundi ruhande, abagore bo mu bihugu bicyubaka ubushobozi umugore umwe ku bagore 27 aba yugarijwe n’iyo ndwara.

Ndetse umugore umwe mu bagore 48 iramuhitana nk’uko WHO/OMS ibyemeza.

99% by’abarwara iriya cancer ni abagore n’aho abari  hagati ya 05% na 1% bakaba abagabo.

Ibyongera ibyago byo kurwara cancer y’ibere ni byinshi.

Abaganga bavuga ko abagore batonsa kenshi ari bo bagira ibyago byo kurwara iriya ndwara.

Uretse kutonsa kenshi, indi mpamvu yatera icyo kibazo ni imyaka y’ubukure yigiye imbere ku mugore, kunywa inzoga nyinshi kandi kenshi, ibigize uturemangingo tw’umuntu bitewe n’abo akomokaho, kwitegeza cyane imirasire ikaze icengera umubiri( babyita radiation exposure) n’ibindi.

Abagore bagejeje kandi barengeje imyaka 40 bari mu bibasirwa cyane n’iyi ndwara.

Ku byerekeye u Rwanda, abahanga bavuga ko kimwe mu bibangamira ubuvuzi bwa cancer ari uko imiti ihenda, abahanga mu buvuzi bwa cancer bake  n’ibitaro bakiri bake, hakaba n’abaganga badafite ubumenyi bwo kwita ku muntu urwaye indwara idakira, abo bita Palliative care specialists.

Ibiganiro byavugiwemo uko cancer yifashe mu Rwanda byateguwe n’Ihuriro Nyarwanda ry’abagore barwanya cancer y’ibere ( Women Cancer Relief Foundation, WCRF) ku bufatanye n’ikigo cy’igihugu cy’ubuzima, RBC.

Iryo huriro rishinzwe gukora ubukangurambaga kuri iyi cancer, abagore bakabwirwa uko izamuka, uko ivurwa n’uburyo yakwirindwa niba bishoboka.