Ku mugoroba wo kuri uyu wa Gatatu tariki 27 Mutarama, 2021 hamenyekanye amakipe umunani azahura muri kimwe cya kane (1/4) cy’imikino Nyafurika ihuza abakinnyi bakina muri Shampiyona z’iwabo (CHAN 2020).
Zambia na Guinea nizo kipe zuzuje umubare w’amakipe umunani agomba gukomeza muri iyi mikino iri kubera muri Cameroun.
Amakipe yari ari mu itsinda A azahura n’ayakomeje mu itsinda B.
Iyabaye iya mbere izahura n’iya kabiri, nk’uko bigenwa n’amategeko y’irushanwa.
Amakipe yabarizwaga mu itsinda C azahura n’ayakomeje mu itsinda D, iyabaye iya mbere ikazahura n’iya kabiri.
Ku wa Gatandatu tariki 30 Mutama 2021 saa kumi n’ebyiri z’umugoroba, Mali izakina n’ikipe ya Congo Brazaville, mu gihe saa tatu z’ijoro Cameroun yakiriye irushanwa izakina na DR Congo.
Ku Cyumweru tariki ya 31 Mutarama 2021, saa kumi n’ebyiri z’umugoroba Morocco yabaye iya mbere mu itsinda C izakina na Zambia yabaye iya kabiri mu itsinda D.
Guinea yabaye iya mbere mu itsinda D izakina n’Amavubi y’ u Rwanda yabaye aya kabiri mu itsinda C ku isaha ya saa tatu z’ijoro.
Ikipe zizava muri iki kiciro, zizakina imikino ya 1/2 izatangira tariki 03 Gashyantare 2021 Mu gihe umukino wa nyuma uzaba tariki 7 Gashyantare 2021.
