Abaturage ba Burkina Faso basanze uburyo bwiza bwo kubana na COVID-19 ari ukuyishyiramo urwenya, ukayirinda ariko ntigukure umutima. Muri Ouagadougou basigaye bavuga ngo Les Poches Sont Confinées bashaka kuvuga ko agafaranga kabuze.
Kimwe no mu Rwanda, muri Werurwe, 2020 nibwo COVID-19 yageze muri Burkina Faso. Ubutegetsi bwa Perezida Roch Marc Kaboré bwafashe ingamba zari zikenewe ngo abaturage be batacyandura ari benshi kikabahitana.
Urubyiruko rw’i Ouagadougou rwaje guhanga amagambo y’Igifaransa arimo gutebya kandi ahuje n’icyorezo COVID-19, ibyo bise ‘Expressions Covidées’.
Umwe muri bo witwa Fréderic Tindano yagize ati: “ Muri iki gihe iwacu iyo umuntu ashaka kuvuga ko nta kintu kiri mu mufuka we, mbese ko agafaranga kabuze avuga ko les poches sont confinées. Iyo dushatse kuvuga ko umuntu agomba guceceka, akaruca akarumira dukoresha imvugo ngo le confinement bucal total.”
Muri iki gihe iyo umuntu yanduye COVID-19 muri Burkina Faso bavuga ngo runaka ‘est covidé(e).
Iyo abantu bajyaga impaka hanyuma umwe akumva atagishaka kugira icyo avuga ku ngingo iri kuvugwaho, abwira bagenzi be ati: “ Je Porte le masque”.
Kuri bo ikiganiro kivuga kuri COVID-19 ariko kirimo gutera urwenya ni uburyo bwabo bwo guhangana nayo.
