Uwahoze ari umunyamakuru akaba n’umuyobozi w’ikinyamakuru Ishema Fidel Uzabakiriho Gakire yasabiwe n’ubushinjacyaha gufungwa imyaka itanu n’ihazabu ya miliyoni Frw 3. Ni ku cyaha cyo gukoresha impapuro mpimbano bumurega.
Kuri uyu wa Kabiri nibwo yitabye urukiko rwisumbuye rwa Nyarugenge ngo aburane kuri iki cyaha.
Yari asanzwe afungiye muri gereza ya Mageragere mu Karere ka Nyarugenge.
Ubushinjacyaha kandi buvuga ko uriya mugabo yari asanzwe akorera mu cyo bise Guverinoma y’u Rwanda ikorera mu buhungiro, iyi ikaba yaranamuhaye urupapuro rw’inzira rutemewe yahawe ku $85.
Yafunzwe taliki 24, Ugushyingo 2022, akaba yari afungiwe i Mageragere mu Karere ka Nyarugenge.
Gakire yahoze ari umunyamakuru n’umuyobozi w’ikinyamakuru Ishema, yafashwe nyuma y’uko yari amaze iminsi yaragiye muri Leta Zunze Ubumwe za Amerika.
Ubwo yari amaze kugera muri New York, Gakire yatangaje ku mugaragaro ko yinjiye muri Politiki.
