Umutoza wa Rayon Sports Haringingo Francis avuga ko umukino ari bukine na Jamus FC uraba ukomeye, bityo ko ategura abakinnyi be bakaza gukora ibishoboka byose bakawutsinda.
Uraba ari umukino wa 1/2 cya CECAFA Kagame Cup 2026 uri bubere kuri Kigali Pélé Stadium saa moya z’ijoro kuri uyu wa Kabiri italiki 04, Kanama(8), 2026.
Haringingo yabitangarije mu kiganiro n’itangazamakuru cyavugaga kuri uyu mukino, akemeza ko Jamus FC ikomeye kuko yavuye mu itsinda ryari rikomeye.
Ati: “Twiteguye neza. Jamus FC ni ikipe yavuye mu itsinda rikomeye kuko yari kumwe na Singida Black Stars ibitse igikombe 2025 na Simba SC ikipe ikomeye. Yazamutse ari iya mbere, kandi ibintu bakoze byerekana ko ari ikipe ikomeye.”
Kubera iyo mpamvu, Francis Haringingo avuga ko ari butegure Rayon Sports ikaza ishaka intsinzi ku rwego rwo hejuru.
Uretse uyu mukino kandi, Saa Cyenda z’igicamunsi Al Hilal SC irabanza ikine na Gor Mahia FC mu mukino wa mbere wa 1/2 aho kwinjira muri iyi mikino yose itike ya macye ari Frw 3000 ahasigaye hose, Frw 10,000 ahatwikiriye, Frw 30,000 muri VIP ndetse na Frw 50,000 ah’icyubahiro cyo ku rundi rwego kandi uwishyuye yemerewe kureba imikino yombi.
