Menu
Indimi
Advert

Icyorezo COVID-19

Inkingo Ibihumbi 240 Za COVID-19 Zageze Mu Rwanda, Izindi Ziri Mu Nzira

Yanditswe kuwa

Minisiteri y’Ubuzima yakiriye icyiciro cya mbere cy’inkingo z’icyorezo cya COVID-19, zabonetse binyuze muri gahunda mpuzamahanga yo gufasha ibihugu kubona inkingo z’iki cyorezo gikomeje kwibasira Isi, COVAX.

Mu gitondo cyo kuri uyu wa Gatatu nibwo inkingo 240.000 za AstraZeneca zageze ku Kibuga Mpuzamahanga cy’Indege cya Kigali, zitwawe n’indege ya Qatar Airways.

Mu bayobozi bazakiriye harimo Minisitiri w’Ubuzima Dr Ngamije Daniel, Umuhuzabikorwa w’Umuryango w’Abibumbye mu Rwanda Fodé Ndiaye na Ambaderi w’Umuryango w’Ubumwe bw’u Burayi, Nicola Bellomo.

Binyuze muri gahunda ya COVAX irangajwe imbere n’Ishami ry’Umuryango w’Abibumbye ryita ku buzima (WHO), ihuriro Gavi n’abandi bafatanyabikorwa, hamaze kuboneka inkingo miliyoni 237 za AstraZeneca /Oxford zatunganyijwe n’ikigo Serum Institute cyo mu Buhinde, n’inkingo miliyoni 1.2 za Pfizer-BioNTech. Ni zo zirimo gusaranganywa ibihugu 142.

Biheruka kwemezwa ko hagati ya Gashyantare na Gicurasi 2021 u Rwanda ruzahabwa inkingo 744.000 za AstraZeneca na 102.960 za Pfizer/BioNTech. Ku ikubitiro rwakiriye inkingo ibihumbi 240 za AstraZeneca, ndetse ku mugoroba wo kuri uyu wa Gatatu harakirwa 102.960 za Pfizer.

Mu itangazo Minisiteri y’Ubuzima yasohoye, Minisitiri Ngamije yavuze ko izo nkingo zizifashishwa mu gukingira abantu 171.480 batoranyijwe mu matsinda afite ibyago byinshi byo kwandura COVID-19 cyangwa kuzahazwa na yo.

Yakomeje ati “Intego dufite ni ugukingira 30% by’abaturage bacu kugeza mu mpera z’uyu mwaka wa 2021, na 60% kugeza mu mpera z’umwaka wa 2022.”

Gukingira bigiye gutangira

Kuri uyu wa Kane izi nkingo zizakwirakwizwa hirya no hino mu bitaro by’uturere n’ibigo nderabuzima 508 bizakingirirwamo. Gukingira bizatangira ku wa Gatanu, abazahabwa inkingo bakazagenda bamenyeshwa.

Hazakingirwa abari mu nzego z’ubuzima guhera ku bajyanama b’ubuzima kugera ku muganga bo mu bitaro bya kaminuza, abakozi bafasha mu kurwanya COVID-19, abaturage bafite hejuru y’imyaka 65 n’abarwaye indwara karande.

Hari icyizere ko kugeza mu mpera za Kamena 2022 umuturarwanda wese ugomba gukingirwa azaba yamaze kubona urukingo. Hazakingirwa nibura miliyoni 7.8.

Minisitiri Ngamije yasabye abazakingirwa gukomeza kubahiriza amabwiriza yo kwirinda COVID-19 arimo kwambara agapfukamunwa, guhana intera hagati y’umuntu n’undi, kwirinda kujya mu makoraniro no gukaraba intoki neza kandi kenshi.

Yashimangiye ko guverinoma y’u Rwanda ikomeje ibiganiro n’inzego nyinshi kugira ngo haboneke inkingo zihagije.

Inkingo za AstraZeneca cyangwa Pfizer zisaba ko umuntu aziterwa inshuro ebyiri kugira ngo agire ubwirinzi bwuzuye. Hagati y’urukingo n’urundi hajyamo nibura ibyumweru bitatu.

Ubushakashatsi ariko bukomeje kugaragaza ko iyo umuntu yatewe urukingo rwa mbere rumwongerera amahirwe ashobora kugera kuri 80%, yo kutaremba igihe yaba yanduye COVID-19.

Abayobozi barimo Minisitiri w’Ubuzima Dr Daniel Ngamije bagiye kwakira izi nkingo

 

Tanga igitekerezo

Tanga igitekerezo

Your email address will not be published. Required fields are marked *

Advertisement
Advertisement
Advertisement
Advertisement
Advertisement
Advertisement
Advertisement