Amakuru ava i Teheran avuga ko hari ibitero indege za Pakistan zagabye muri Iran mu rukerera rwo kuri uyu wa Kane taliki 18, Mutarama, 2024. Ni ibitero byo kwihorera ku bindi Iran nayo iherutse kugaba ku butaka bwa Pakistan mu minsi ibiri ishize.

Ubuyobozi bwa Iran bwasabye ubwa Pakistan ibisobanuro ku cyabuteye kubavogerera ubutaka, ariko abandi bavunira ibiti mu matwi.

Iran ivuga ko hari missiles z’indege za Pakistan zaguye ahitwa  Sistan-Baluchestan, iyi ikaba ari Intara ikora kuri Pakistan.

Ibiro ntaramakuru bya Iran bivuga ko hari abaturage bayo icyenda bahitanywe n’izo missiles.

Uruhande rwa Pakistan ruvuga ko biriya bitero byari bigamije guce intege abakorera iterabwoba iki gihugu barangiza bakajya kwihisha muri Iran.

Minisitiri w’ububanyi n’amahanga w’iki gihugu avuga ko Islamabad idashobora kuvogera ubusugire bw’ikindi gihugu kuko izi icyo ubusugire bw’igihugu buvuze mu mibanire mpuzamahanga.

Yavuze ko icyo Pakistan yakoze ari ugukurikirana abashaka kuyivogera kandi ngo ni ibintu byumvikana kandi biba ahantu hose ku isi.

Ubuyobozi bwa Pakistan bwabwiye Reuters  ko biriya bitero byagabwe n’indege ya gisirikare bikaba byari bigamije kwigizayo abarwanyi b’aba Baloch bagize umutwe witwa Balochistan Liberation Front, uyu ukaba ushaka ko Intara ya Baloch yigenga.

Ku rundi ruhande, Iran nayo iherutse gutangaza ko yagabye igitero ku barwanyi baba muri Pakistan bakorana na Israel.

Pakistan iherutse gutumiza Ambasaderi wayo i Teheran ngo atahe kuko umubano w’ibihugu byombi umeze nabi cyane.