Taarifa yamenye ko isomwa ry’urubanza rwa Edouard Bamporiki ryasubitswe kubera ko ubwanditsi bw’urukiko rukuru rwajuririwe butararangiza kwandika umwanzuro warwo.
Byari biteganyijwe ko ari busomerwe kuri uyu wa Mbere Taliki 16, Mutarama, 2023 saa munani.
Urubanza ruzasomwa taliki 23, Mutarama, 2023.
Taliki 19, Ukuboza, 2022 nibwo Bamporiki aheruka mu rukiko rukuru kugira ngo aburane mu bujurire yatanze ku byaha yahamijwe.
Ibyo byaha birimo kwihesha ikintu cy’undi hakoreshejwe uburiganya no gukoresha mu nyungu ze bwite ububasha umuntu ahabwa n’itegeko.
Muri Nzeri, 2022 urukiko rwisumbuye rwa Nyarugenge rwakatiye uyu mugabo gufungwa imyaka ine, agatanga n’ihazabu ya Miliyoni Frw 60.
Icyo gihe mu isesengura ryarwo, ku cyaha cya mbere Bamporiki yaregwaga urukiko ryasanze kuba kwakira indonke ari icyaha gikorerwa mu ibanga rikomeye, hakaba hari n’ababyita amayeri yandi nko kuyita umuti w’ikaramu, bivuze ko kuba Edouard Bamporiki yarakiriye Miliyoni Frw 5 yitwa inzoga ‘nabyo ari indonke.’
Inteko iburanisha yanavuze ko urukiko rusanga Bamporiki ahamwa n’ibyaha bibiri ariko mu kumuhana hakitabwa ku mpamvu nyoroshyacyaha kuko uregwa yemera ibyaha.
Mu bushishozi bwarwo, Urukiko rwisumbuye rwa Nyarugenge rwaje kwanzura ko ahanishwa igifungo cy’imyaka ine n’ubwo ubushinjacyaha bwari bwaramusabiye gufungwa imyaka 20 n’amande ya Miliyoni Frw 200 mu iburanisha ryabanje.
Rwanzuye ko afungwa imyaka ine(4) agatanga na amande ya Miliyoni Frw 60.
Icyo gihe saa munani z’amanywa zirenzeho iminota mike nibwo Inteko yaburanishije urubanza rwa Edouard Bamporiki yatangiye gusoma imyanzuro yagezeho.
Icyakora ntiyari ahari ndetse n’ubushinjacyaha ntibwitabiriye isomwa.
