Umukino waraye uhuje Amavubi y’u Rwanda na Camaroun warangiye amakipe yombi anganyije, bituma amahirwe Amavubi y’u Rwanda yari afite ayoyoka.
Kuri uyu wa 30 Werurwe 2021 ni bwo kandi imikino yo gushaka itike y’imikino y’Afurika “CAN 2021” izabera muri Cameroun umwaka utaha wa 2022 warangiye.
Amavubi yari iri mu itsinda F. Yakinnye umukino urangiza mu itsinda ifite amahirwe yo kubona itike ariko byasabaga imibare myinshi irimo gutsindira Cameroun iwayo, byaba amahire Mozambique igatsinda Cap Vert.
Umukino w’ ikipe y’u Rwanda na Cameroun wabereye kuri Sitade Japoma i Douala, urangira zombi zinganyije 0-0.
Ku ruhande rw’u Rwanda, abakinnyi basoje umukino ari 10 nyuma y’aho umunyezamu Kwizera Olivier aherewe ikarita y’umutuku ku munota wa 54.
Ku rundi ruhande, Cap Vert yatsindiye Mozambique iwayo igitego 1-0 cyabonetse ku munota wa 58 gitsinzwe na Faisal Bangal .
Nyuma y’iyi mikino, Cameroun izakira irushanwa yazamutse iyoboye itsinda n’amanota 11 ikurikirwa na Cap Vert n’amanota 10 akaba ari nazo kipe zahise zibona itike ya CAN 2021. Ikipe y’u Rwanda “Amavubi” yarangije iri ku mwanya wa gatatu n’amanota atandatu naho Mozambique ijya ku mwanya wa kane wa nyuma n’amanota ane.
Amavubi yatangiye urugendo rwo gushaka itike ya CAN 2021 nabi itsindwa imikino ibiri ya mbere harimo umukino wa Mozambique yatsinzwe ibitego 2-0 ndetse n’uwa Cameroun yatsinzwe igitego 1-0.
Mu yindi mikino Amavubi yihagazeho ubwo yanganyaga na Cap Vert imikino ibiri 0-0, atsinda Mozambique igitego 1-0, ariko arangiza anganyije na Cameoun 0-0.
Ikipe y’u Rwanda mu mikino itandau yabashije kwinjiza igitego kimwe yinjizwa ibitego bitatu.
Amakipe 24 azakina CAN 2021
Ayo ni Cameroun izakira irushanwa, Senegal, Algeria, Mali, Tunisia, Burkina Faso, Guinea, Comoros, Gabon, Gambia, Misiri, Ghana, Guinea Equatorial, Zimbabwe, Ivory Coast, Morocco, Nigeria, Sudan, Malawi, Ethiopia, Mauritania, Guinea-Bissau na Cap Vert.
Ikipe y’igihugu ya Comoros na Gambia ni inshuro ya mbere zigiye kwitabira imikino ya CAN. Ikipe y’igihugu ya Malawi ni yo yongeye kubona itike yari imaze igihe kinini ititabira kuko yaherukaga muri 2010 hakaba hari hashize imyaka 11.
Misiri ni yo kipe y’igihugu imaze kwitabira inshuro nyinshi (25) ikaba ari nayo ifite iki gikombe inshuro nyinshi (7). Ikipe ya Algeria ni yo iheruka kwegukana igikombe cy’Afurika “CAN 2019”, irushanwa rikaba ryari ryabereye mu Misiri.
CAN 2021 igiye kuba ku nshuro ya 33 yagombaga gukinwa uyu mwaka wa 2021 ariko kubera COVID-19 yatumye imikino ihagarara, imikino yimuriwe muri Mutarama na Gashyantare 2022.
