Mu ijoro ryo kuri uyu wa Gatandatu taliki 28, Nyakanga, 2023 umugabo witwa Théogène Twagirimana yapfiriye muri Gare ya Musanze nyuma yo kugwa hasi.
Yari akiri muto kuko yari afite imyaka 37 y’amavuko.
Ubutabazi bwamukorewe ngo barebe ko yazanzamuka ntacyo bwagezeho kuko yagejejwe kwa bitaro bya Muhoza yarangije kunogoka.
Iby’urupfu rwe kandi byamejwe n’umunyamabanga nshingwabikorwa w’Akagari byabeyeremo ka Kigombe witwa Assoumini Mukamusoni .
Uyu muyobozi yabwiye Kigali Today dukesha iyi nkuru ko amakuru yamugezeho yavugaga ko uriya mugenzi yavaga i Musanze atashye i Gakenke.
Ati “Ni umugenzi watahaga yerekeza iwabo mu Karere ka Gakenke. Ntabwo twamenya ngo yavaga he ariko yari ari kumwe n’umuvandimwe we bageze muri gare ya Musanze yitura hasi ahita apfa”.
Umuvandimwe we witwa Marcel Birutakwinginga yabwiye ubuyobozi ko umuvandimwe we yari asanzwe arwaye.
Uwo muyobozi yavuze ko batamenye impamvu yateye uwo mugabo kwitura hasi mu buryo butunguranye, gusa ngo amakuru bahawe n’umuvandimwe we bari kumwe witwa Birutakwinginga Marcel, yemeje ko ngo yari asanzwe arwaye.
