Mu Burundi hatangijwe Shampiyona bise Nkurunziza Cup. Umukino wa mbere wakiniwe ku kibuga kitwa Nkurunziza Peace Park iri mu Ntara ya Makamba.
Amakipe ya mbere ari bukine umukino wa mbere ni Le Messager y’i Ngozi na Flambeau du Centre, ukaba uri bucishwe kuri radio nkuru y’u Burundi.
Pierre Nkurunziza witiriwe iyi Shampiyona yari umukunzi w’umukino w’umupira w’amaguru cyane k’uburyo yari yarashinze ikipe yise Alleluia FC.
Iyi kipe muri Gashyantare, 2018 yigeze gukina umukino wa gicuti n’indi kipe yitwa Kiremba FC, abakinnyi ba rutahizamu b’iyi kipe baza gufungwa n’inzego z’umutekano wa Perezida Pierre Nkurunziza babaziza ko bamukiniye nabi, bakaba barashakaga ‘kumuvuna’.
Mu bafunzwe icyo gihe harimo na Burugumesitiri wa Komini Kiremba Bwana Cyriaque Nkerabahizi, hamwe n’uwari ushinzwe siporo muri iriya komini witwa Michel Mutama.
