Ikigo cy’Igihugu cy’Ibarurishamibare mu Rwanda kivuga ko igereranya ry’uko ibiciro ku isoko byari byifashe muri Gicurasi, 2025 ubigereranyije no muri Mata uwo mwaka, usanga byariyongereye bigera ku kigero cya 6.9% bivuye kuri 6.3 % byariho icyo gihe.

Iryo zamuka ahanini rishingiye ku mpinduka zabaye ku biciro by’ibikomoka k’ubuhinzi, iby’ibinyobwa bisembuye n’ibidasembuye, ubwikorezi, amahoteli, resitora n’ibindi.

Ikusanyamabire rya kiriya kigo ryerekana ko muri Gicurasi, 2025,  ibiribwa n’ibinyobwa bidasembuye byiyongereye ku kigero cya 9.2% naho mu mu gihe cy’umwaka byiyongereyeho 0.5% ni ukuvuga ugereranyije Gicurasi ya  2025 na Gicurasi ya 2024.

Ibiciro by’inzu, amazi, amashanyarazi, gaze n’ibindi bicanwa byiyongeraho 3.3%, naho mu gihe cy’ukwezi byiyongeraho 0.7%.

Ubwikorezi bwiyongereyeho 3.7% muri uyu mwaka mu gihe muri Gicurasi ugereranyije na Mata bwazamutseho  0.4 %, amaresitora n’amahoteli yiyongereyeho ku biciro ku kigero cya 16.6% mu gihe cy’umwaka wose, agira izamuka rya 1.7 % muri Gicurasi ugereranyije na Mata, 2025.

Raporo igaragaza ko n’ibicuruzwa by’imbere mu gihugu byiyongereyeho 6.9%, naho mu gihe cy’ukwezi byiyongeraho 0.1%.

Ibyatumijwe mu mahanga byiyongereyeho 6.9% naho mu gihe cy’umwaka wose bikaba byarazamutseho 2% ugereranyije Gicurasi zombi.

Ibikomoka ku buhinzi byiyongereyeho 12.3% ariko bigabanukaho 1.4% muri Gicurasi, mu gihe ibiciro by’ingufu byagabanyutseho 0.8% muri uyu mwaka ariko byiyongeraho 1.9% muri Gicurasi ugereranyije na Mata, 2025.

Abahanga mu bukungu bavuga ko kwiyongera kw’ibiciro ku masoko y’imbere mu gihugu ahanini biterwa n’umusaruro wabonetse, hakiyongeraho n’ubwinshi bw’ibyo igihugu gikura mu nganda zacyo kikabyohereza hanze.

Ingaruka z’imihindagurikire y’ikirere ziri mu bitubya umusaruro binyuze mu mvura nke igwa mu gihugu mu bihe by’ihinga cyangwa bibanziriza isarura.