Tanzania Hagiye Kuba Irushamwa Mpuzamahanga Rya Golf Rizitabirwa N’Abanyarwanda - Taarifa
Menu
Indimi

Imikino

Tanzania Hagiye Kuba Irushamwa Mpuzamahanga Rya Golf Rizitabirwa N’Abanyarwanda

Yanditswe kuwa

Mu ntangiriro za Mata, 2022 ni ukuvuga guhera taliki 04, kugeza taliki 10, muri Tanzania  hazabera irushanwa ry’umukino wa Golf wateguwe n’Ikigo International Sports Management ndetse n’Ihuriro ry’abakinnyi ba Golf muri Tanzania.

Intego ni ukurushaho gukundisha abantu uyu mukino ndetse no kuzamura urwego rw’ubukerarugendo muri Tanzania.

Tanzania ni kimwe mu bihugu bifite ubukerarugendo buteye imbere.

Ifite zimwe muri pariki nini kurusha izindi muri Afurika y’i Burasirazuba.

Ririya rushanwa ryiswe  European Challenge Tour, rizabera ahitwa The Kilimanjaro Golf & Wildlife Estate.

Ni ubwa mbere rizaba ribaye.

Uretse kuzamura ubukerarugendo,  rizafasha n’abaturage ba Tanzania gukunda umukino wa Golf.

Tanzania ni igihugu gituwe n’abaturage miliyoni 62.

Muri kiriya gihugu haba ibibuga bitatu bya Golf, buri kimwe kikagira utwobo 18, mu gihe mu Rwanda hari ibibuga bibiri.

Kimwe cyubatswe i Nyarutarama, ikindi kitwa Falcon Golf and Country Club kiri ku nkengero z’ikiyaga cya Muhazi mu Karere ka Rwamagana.

Abanyarwanda bakina Golf basaba Leta y’u Rwanda kubafasha kubona ibindi bibuga bya Golf  kubera ko umukino wa Golf ari umwe mu bikurura ba mukerarugendo, binjiza mu kigega cya Leta.

Basaba ubuyobozi bwa RDB kuzakorana n’Umuryango mpuzamahanga w’abakina Golf witwa International Association of Golf Tour Operators kugira ngo biriya bibuga byubakwe.

Basaba RDB kubaka biriya bibuga kuko ari ikigo gisanzwe gifite mu nshingano zabo guteza imbere ibikorwa bifite aho bihuriye n’iterambere ry’igihugu.

Umuyobozi w’Impuzamashyirahamwe y’umukino wa Golf muri Tanzania ( Tanzania Golf Union) witwa Chris Martin ashima ko Leta ya Tanzania yagize uruhare mu itegurwa rya ririya rushanwa binyuze mu mikoranire myiza na Minisiteri ishinzwe umutungo kamere no guteza imbere ubukerarugendo.

Chris Martin ati: “ Twishimiye gukorana na Leta ya Tanzania muri iki gikorwa kandi twizeye ko kizagera ku ntego yacyo harimo guteza imbere ubukerarugendo mu gihugu cyacu no kurushaho gukundisha abantu umukino wa Golf.”

Undi munya Tanzania umaze igihe mu mukino wa Golf witwa Enock Magire avuga ko guteza imbere ubukerarugendo bwa Tanzania ari ngombwa kubera ko buri mu nkingi zikomeye ubukungu bwayo bwubakiyeho.

Ati: “ Twizeye ko umukino wa Golf uzarushaho guhuza abantu bakaganira bakabwirana ibyiza nyaburanga bya Tanzania bityo ukagira uruhare mu guteza imbere ubukerarugendo muri iki gihugu.”

Umuyobozi ku rwego rw’Afurika  w’Ikigo cyateguye iri rushanwa cyitwa International Sports Management Umunyarwanda Innocent Rutamu avuga kuba Tanzania ari kimwe mu bihugu bya mbere ku isi bifite ubukerarugendo buteye imbere kandi bukinjiriza.

Ku rundi ruhande, avuga ko umukino wa Golf uzongera urwego ubukerarugendo bwa Tanzania buri ho.

Hari ikinyamakuru kitwa Statista.com cyanditse ko mu mwaka wa 2021, abantu 92,000 basuye Tanzania mu rwego rw’ubucyerarugendo.

Abashaka kuzakurikirana iriya mikino bazayirebera kuri DSTV,  Sky Sports no ku rubuga rwa www.Kilimanjaroklassic.co.tz

Ni ikibuga kinini kandi kibereye gukinirwaho umukino mpuzamahanga

Ni irushanwa mpuzamahanga

Uba witegeye umusozi wa Kilimanjaro. Ni umusozi uri mu biranga ubwiza nyaburanga bwa Tanzania

Ifito yafashwe na drone yerekana ahazabera iriya mikino

 

Tanga igitekerezo

Tanga igitekerezo

Your email address will not be published.

Advertisement

English Version

Advertisement
Advertisement Enter ad code here