Ubutegetsi bwa Ankara bwatangaje ko bucanye umubano na Israel kubera intambara yayo muri Gaza.
Turikiya ivuga ko itakomeza gucuruzanya n’igihugu cyatumye ubuzima bw’abantu babarirwa muri za miliyoni babaho nabi muri Gaza.
Minisitiri w’ubucuruzi muri Turikiya yavuze ko iki gihugu kizahagarika ubucuruzi na Israel kugeza ubwo izahagarika intambara yayo muri Gaza.
Ikindi Ankara ishinja Yeruzalemu ni uko itemera ko n’inkunga igenewe abahungiye intambara muri Gaza ibageraho mu buryo bworoshye.
Imibare yerekana ko ubucuruzi hagati ya Israel na Turikiya mu mwaka wa 2013 bwari kuri miliyari $7, ni ukuvuga miliyari £5.6.
Israel nayo yagize icyo ivuga kuri iki kibazo.
Minisitiri wayo w’ububanyi n’amahanga witwa Israel Katz yise Perezida Erdogan wa Turikiya ‘umunyagitugu’.
Katz yanditse kuri X ko ibyo Turikiya iri gukora ari uguhemukira abashoramari bo mu gihugu cye kuko bizabahombya.
Yunzemo ko icyemezo cye gihabanye n’amabwiriza mpuzamahanga y’ubucuruzi.
Ubu nta gicuruzwa na kimwe kiva muri Turikiya kijya muri Israel.
Amateka yerekana ko Turikiya ari cyo gihugu mu by’Abarabu cyabanje kwemera ko Israel ari igihugu kigenga, hari mu mwaka wa 1949 nyuma y’uko Leta ya Israel itangajwe mu mwaka wa 1948.
Mu mwaka wa 2010 uyu mubano waje kuzahara ubwo abanya Palestine 10 bicagwa n’abakomando ba Israel babasanze mu bwato bwakorewe muri Turikiya.
Nyuma ibihugu byombi byongeye kubana neza ariko nabyo ntibyatinda kuko mu mwaka wa 2016 byongeye kuzamba nyuma y’uko Israel yishe abanya Palestine bari barimo kwigaragambiriza hafi y’umupaka wayo ari nako batera ibintu byaka umuriro muri Israel.
Perezida wa Turikiya aherutse kuvuga ko ibyo Netanyahu akora ntaho bitandukanye n’ibyo Hitler yakoze mu myaka ya 1940 ubwo yakoreraga Abayahudi Jenoside.
Netanyahu nawe yanze kuripfana avuga ko Erdogan atari we wagombye kuvuga atyo kuko igihugu ayobora cyakoreye abanya Armenia Jenoside.
BBC yanditse ko ibiri kubera muri Gaza ahari impunzi nyinshi zo muri Palestine biteye akaga kanini ndetse ngo hari inzara iri guca ibintu.
Aka gace ubu karimo abantu b’ingeri zose bagera kuri miliyoni ebyiri.
Abasesengura ibyo mu Burasirazuba bwo Hagati bavuga ko Turikiya ishaka kugira ijambo mu Barabu kurusha uko bimeze kuri Iran.
Iran nayo ishaka ko iba igihugu gifatwa nk’ikivugira inyungu z’Abarabu mu ruhando mpuzamahanga cyane cyane mu maso y’Abarabu.
