Mu rukiko rw’ibanze rwa Nyarugenge habereye iburanisha ku ifungwa n’ifungurwa by’agateganyo mu rubanza Ubushinjacyaha buregamo Eugene Barikana wahoze ari Umudepite akaba aherutse gusanganwa ibisasu birimo birimo na Grenade.

Ku ruhande rwa Barikana, we yemera icyaha akinginga urukiko ko yakurirwaho ibihano ariko ubushinjacyaha bwo bukamusabira gufungwa imyaka ibiri.

Biteganyijwe ko icyemezo cy’Urukiko kizasomwa ku wa Gatatu tariki ya 29 Gicurasi 2024.

RIB yafunze Eugene Barikana nyuma yo kumusangana amasasu na grenade yari atunze mu buryo ubugenzacyaha buvuga ko butari bukurikije amategeko.

Gufungwa kwe kwabaye nyuma gato y’uko yeguye ku mwanya wa Depite

Agifatwa, Barikana Eugene yabwiye RIB ko izo ntwaro yazitunze akibana n’abasirikare yibagirwa kuzisubiza.

Urukiko rumuhamije ibyaha ubushinjacyaha bumurega, Barikana yafungwa umwaka umwe cyangwa ibiri agatanga n’ihazabu iri hagati ya miliyoni Frw 1 na miliyoni Frw 2 cyangwa kimwe muri ibyo bihano.