Umugabo wa Perezida wa Tanzania, Samia Suluhu Hassan, Hafidh Ameir Hassan, yitabye Imana kuri uyu wa Mbere tariki ya 7 Nzeri 2026, ubwo yari arimo kuvurirwa i Zanzibar.
Iyi nkuru yatangajwe na Visi Perezida wa Tanzania, Deogratius Ndejembi, wavuze ko Hafidh yapfuye ahagana saa mbiri za mu gitondo ku bitaro bya Mlimani Mzena Memorial Hospital, aho yari arimo kuvurirwa indwara y’umutima.
Mu butumwa bwe, Ndejembi yagize ati: “Mbabajwe cyane no gutangaza urupfu rwa Nyakubahwa Hafidh Ameir Hassan, umugabo wa Perezida wa Repubulika Yunze Ubumwe ya Tanzania, Nyakubahwa Dr. Samia Suluhu Hassan.”
Yihanganishije Perezida Samia, umuryango we, inshuti n’abavandimwe, ndetse n’Abanya-Tanzania muri rusange, nyuma y’urupfu rwa Hafidh.
Visi Perezida yavuze ko imyiteguro y’umuhango wo gusezera kuri Hafidh yatangiye gukorerwa i Kizimkazi, muri Zanzibar.
Hafidh Ameir Hassan yari umuhinzi w’umwuga, akaba yari yarabaye Umugabo wa Mbere wa Tanzania nyuma y’uko umugore we Samia Suluhu Hassan aba Perezida mu 2021.
Samia na Hafidh bashyingiranywe mu 1978, bakabyarana abana bane, barimo abahungu batatu n’umukobwa umwe.
Umukobwa wabo, Mwanu Hafidh Ameir, na we ari muri politiki kandi ahagarariye abaturage mu Nteko Ishinga Amategeko ya Zanzibar.
Hafidh yari azwiho kugendera kure ubuzima bwa politiki n’itangazamakuru, ndetse yakunze kurangwa no kutagaragara cyane mu bikorwa bya Leta.
