Abagize Unity Club bahagarariye abandi basuye ababyeyi b’Impinganzima baba mu rugo rwa Bugesera babashimira umutima wo gutwaza wabaranze mu mwaka wa 2023 banabifuriza kuzagira umwaka mushya muhire wa 2024.
Prof Jolly Mazimhaka usanzwe ari Umunyamuryango wa Unity Club akaba yari umushyitsi mukuru niwe wagejejeho intashyo z’Umuyobozi Mukuru w’Umuryango Unity Club, Nyakubahwa Jeannette KAGAME, Madamu wa Perezida wa Repubulika y’u Rwanda.
Yababwiye mu mpera z’umwaka, abana basura ababyeyi babo bakabaganiriza, bagasangira ibyishimo bakaboneraho no kwifurizanya umwaka mushya muhire, kandi ngo icyo nicyo cyabazinduye.
Prof. Jolly Mazimhaka ati:”Tunejejwe no kongera kwicarana namwe babyeyi bacu muri uru rugo rwiza rw’IMPINGANZIMA, ngo twongere dusangire ibyishimo by’impera z’umwaka”
Avuga ko bisanzwe mu muco nyarwanda ko abana basura ababyeyi kugira ngo baganire, babasusurutse, basabane, basangire ndetse banashimire Imana ko yabarinze.
Uwo munezero ngo ugomba gukomeza no mu mwaka ukurikiye.
Prof Mazimhaka avuga ko iyo migirire yabaye umuco muri Unity Club.
Ababyeyi b’impinganzima zo mu Bugesera bashimiye Jeanette Kagame na Perezida Kagame ko bagize uruhare mu kububaka, bakaba bagiye gusaza neza.
Ingo z’Impinga nzima zashyizweho kugira ngo zifashe ababyeyi b’incike za Jenoside kugira ubuzima bwiza bagasaza neza.
Ni ahantu babonera ubuzima bwiza, bakitahwaho mu buryo bwose, haba kuvuzwa, kugaburirwa, kuganirizwa no gusenga.
Abitabye Imana bashyingurwa mu cyubahiro kigenewe umubyeyi wahekeye u Rwanda.
