Urebye neza, wasanga kuva umwaka wa 2026 watangira, imvura itaramara icyumweru itaguye! Ni ibintu bidasanzwe ndetse Meteo Rwanda ivuga ko no mu mpera za Werurwe, 2026 hazagwa iruta isanzwe igwa mu gihe nk’icyo.
Itangazo ry’ikigo cy’igihugu gishinzwe ubumenyi bw’ikirere rivuga ko mu gice cya gatatu cy’ukwezi kwa Werurwe 2026, mu Rwanda hateganyijwe imvura iri hagati ya milimetero 50 na 150, ikaba iri hejuru y’ikigero cy’impuzandengo y’isanzwe igwa muri iki gice.
Impuzandengo y’imvura isanzwe igwa iri hagati ya milimetero 28 na 105. Iminsi izagwamo imvura izaba iri hagati y’iminsi itandatu (6) n’umunani (8) bitewe n’imiterere ya buri hantu.
Imvura iteganyijwe izaturuka ku isangano ry’imiyaga iva mu gice cy’amajyepfo y’Isi rizamuka rigana mu karere u Rwanda ruherereyemo.
Ubushyuhe bwo hejuru buteganyijwe buri hagati ya dogere Selisiyusi 21 na 30, naho ubushyuhe bwo hasi buteganyijwe buri hagati ya dogere Selisiyusi 9 na 18.
Umuyaga uringaniye ushyira kuba mwinshi ufite umuvuduko uri hagati ya metero 4 na 12 ku isegonda, uteganyijwe mu bice bitandukanye by’Igihugu.
Imvura iteganyijwe iri hagati ya milimetero 130 na 150, iteganyijwe mu bice byinshi by’Uturere twa Nyamasheke na Rusizi, Uburengerazuba n’Amajyepfo by’Akarere ka Nyaruguru, Uburengerazuba bw’ Akarere ka Nyamagabe ndetse n’Amajyaruguru y’Uturere twa Musanze, Burera na Gicumbi.
Imvura iri hagati ya milimetero 110 na 130 iteganyijwe ahasigaye mu Ntara y’Uburengerazuba, ibice bisigaye by’Uturere twa Musanze, Burera, na Nyamagabe, Akarere ka Gakenke uretse Amajyepfo yako, Amajyaruguru n’ibice byo hagati by’Akarere ka Nyaruguru, Amajyaruguru n’Uburengerazuba by’Uturere twa Muhanga na Rulindo, ibice byo hagati by’Akarere ka Gicumbi, ndetse n’ibice bito by’Uburengerazuba bw’Uturere twa Huye, Nyanza, Ruhango na Nyagatare.
Imvura iri hagati ya milimetero 90 na 110 iteganyijwe mu Mujyi wa Kigali uretse mu Majyepfo y’Akarere ka Kicukiro, mu bice byinshi by’Uturere twa Kamonyi na Gisagara, ahasigaye mu Turere twa Nyaruguru, Huye, Muhanga, Gakenke, Rulindo na Gicumbi, mu bice byo hagati by’ Uturere twa Nyanza, Ruhango na Nyagatare, kimwe no mu Burengerazuba bw’Uturere twa Gatsibo na Rwamagana.
Imvura iri hagati ya milimetero 70 na 90 iteganyijwe mu bice by’Amayaga, mu bice bisigaye by’Umujyi wa Kigali n’iby’Intara y’Uburasirazuba uretse Uburasirazuba bw’Uturere twa Nyagatare, Gatsibo, Kayonza, na Kirehe, hateganyijwe imvura iri hagati ya milimetero 50 na 70.
Meteo Rwanda ivuga ko bitewe n’imvura nyinshi imaze iminsi igwa, bigaragara ko ubutaka bwaramaze gusoma, hakaba hanateganyijwe imvura nyinshi irimo inkuba n’umuyaga mwinshi muri iki gice cya gatatu cya Werurwe, mu bice byinshi by’igihugu cyane cyane iby’imisozi miremire harimo Umujyi wa Kigali, Intara y’Amajyaruguru, iy’Iburengerazuba n’iy’Amajyepfo, abantu bakwiye kwitonda.
Iki kigo kigira abantu inama zo gukomeza ingamba zo kwirinda ingaruka zaturuka ku mvura nyinshi, inkuba n’umuyaga mwinshi biteganyijwe, bakurikiza amabwiriza bahabwa n’inzego zishinzwe gukumira ibiza.
