Perezida w’u Burundi, Evariste Ndayishimiye yerekeje muri Repubulika ya Demukarasi ya Congo mu ruzinduko Perezidansi y’u Burundi ivuga ko ari urw’akazi.
Kuri X/Twitter, Perezidansi y’u Burundi yavuze ko Perezida Evariste Ndayishimiye agiye i Kinshasa ku butumire bwa mugenzi we Félix Antoine Tshisekedi Tshilombo, mu rwego rwo gukomeza ibiganiro n’ubufatanye hagati y’ibihugu byombi.
Uru ruzinduko rwa Perezida Ndayishimiye rubaye mu gihe ibihugu byo mu Karere k’Ibiyaga Bigari bikomeje gushaka uburyo bwo gukemura ibibazo by’umutekano no guteza imbere umubano n’ubufatanye mu karere.
Mu ruzinduko rwe, biteganyijwe ko Perezida Ndayishimiye azagirana ibiganiro na Perezida Tshisekedi ku ngingo zitandukanye zirebana n’inyungu z’ibihugu byombi, umutekano n’ubufatanye mu Karere k’Ibiyaga bigari.
Tshisekedi yari aherutse mu ruzinduko muri Tanzania, rwasinyiwemo amasezerano yo gufatanya hagati ya Kinshasa na Dodoma mu bucukuzi bw’amabuye y’agaciro no mu zindi nzego z’ubutwererane.
Ibiganiro Tshisekedi yagiranye na Samia Suluhu byakurikiwe no gusinya amasezerano yasinyiwe mu ngoro y’Umukuru wa Tanzania yiwa Ilkuli iri Ndogo muri Zanzibar.
Perezida Samia Suluhu yanditse kuri X ko ibiganiro yagiranye na mugenzi we byibanze ku gushimangira ubufatanye hagati ya Tanzania na RDC.
Hari amakuru avuga ko Tshisekedi ari kwiyegereza Samia Suluhu kugira ngo amufashe kumuhuza na Joseph Kabila barebana ay’ingwe.
Tshisekedi yifuza ko ubutegetsi bwa Tanzania bumufasha kurinda umujyi wa Kalemie uri ku nkengero z’Ikiyaga cya Tanganyika.
Ikindi ashaka ni ubufasha mu gukumira abarwanyi ba AFC/M23 kugira ngo batazagera mu Mujyi wa Lubumbashi, uri mu Ntara ya Katanga.
Mbere yo kujya muri Tanzania, Tshisekedi yari yabanje muri Congo Brazaville n’i Libreville muri Gabon.
