Ubutegetsi bw’Intara ya Tigray bwategetse ibigo by’ikoranabuhanga n’itumanaho muri iyo Ntara gukuraho interineti.
Byahise bitera ubwoba abaturage n’abaturiye aka gace bw’uko bashobora gukorerwa ibyamfura mbi isi ntibimenye ngo itabare.
Kuri uyu wa Gatanu rero nibwo murandasi yavanyweho muri iyo Ntara iri mu Burengerazuba bwa Ethiopia.
Intambara iri muri aka gace ni yo ikomeye kurusha izindi zabaye kuva intambara yo hagati ya 2020 na 2022 irangiye.
Abantu bane bazi uko ibintu byagenze, harimo uhagarariye igihugu cye muri Ethiopia, babwiye Reuters ko ishyaka TPLF riri ku butegetsi muri Tigray ari ryo ryategetse ibigo Safaricom na Ethio telecom guhagarika telefone na interineti muri iyo Ntara.
Umwe muri bo yavuze ko iyo ngingo ishobora kuba yafashwe mu rwego rwo gutuma igisirikare cya Leta kidakoresha iryo tumanaho mu kohereza drones z’intambara cyangwa iz’ubutasi ku rugamba.
BBC yanditse ko TPLF itasubije ibibazo Reuters yayibajije.
Ariko umuntu ufite aho ahuriye nayo mu buryo bwa hafi, utashatse ko izina rye ritangazwa, yahakanye TPLF ari yo yahagaritse iryo tumanaho.
Reuters ivuga ko ibyo bakoze ngo bahabwe amakuru n’ikigo Ethio telecom ntacyo byagezeho.
Ikigo NetBlocks gikurikirana uko interineti ikora ku isi, cyemeje ko yahungabanye muri Tigray.
Abaturage bavuga ko Ethio telecom yahagaze gukora ku wa kane mu ijoro, bituma badashobora kohererezanya no kwakira amafaranga kuri telefone.
Byateye ubwoba abantu bw’uko Tigray yasubira mu bihe byo mu ntambara ya 2020-2022.
Intambara yo muri iki Cyumweru yatumye abantu birukira kugura ibiribwa, imiti… bakura n’amafaranga muri za banki.
Ibi bibaho iyo abaturage badafite ikizere cy’uko ibintu bizagenda.
Abarwanyi ba Tigray n’ababafasha bahise bigarurira ibibuga by’indege bitatu, bongera bagaba ibitero ku gisirikare cya Leta muri Afar na Amhara.
Bavuga ko bari guhangana n’ibitero bya Leta iyobowe na Minisitiri w’Intebe Abiy Ahmed.
ONU n’Umuryango w’Ubumwe bw’u Burayi basabye impande zose kwirinda ko ibintu byarushaho gukomera.
