Leta ya Kenya yemeje ko umuntu wa mbere wahitanywe na Ebola muri iki cyorezo ari Umunyakenya wari umaze imyaka irindwi aba muri Repubulika Iharanira Demokarasi ya Congo (DRC), aho iyi ndwara ikomeje guhitana abantu benshi.
Minisitiri w’Ubuzima muri Kenya, Aden Duale, yavuze ko uyu murwayi yari amaze ukwezi arwaye ndetse akaba yari yarivuje mu bitaro bitandukanye muri DRC, mbere yo gufata indege aza i Nairobi.
Yageze muri Kenya ku wa Gatandatu, arasuzumwa bisanzwe ku kibuga cy’indege mpuzamahanga cya Nairobi.
Nyuma yaho, umuvandimwe we yamujyanye ku bitaro, aho abaganga bahise batangira gukeka ko yaba arwaye indwara yandura bikomeye.
Uyu murwayi yahise ajyanwa mu kigo cyashyizweho mu gihe cya Covid-19 kugira ngo abarizwemo wenyine. Ni ho yatangiye kugira umuriro mwinshi, kunanirwa , kubabara igihe amira, kubabara imikaya no kuva amaraso mwenge y’umubiri.
Minisitiri Duale yavuze ko abaganga bakoze ibizamini nyuma yo kwitondera ibimenyetso yari afite n’amateka y’urugendo rwe, basanga yaranduye ubwoko bwa Ebola buzwi nka *Bundibugyo*.
Uyu murwayi yapfuye ku wa Mbere saa 23:30, ateganyirizwa gushyingurwa hakurikijwe amabwiriza y’ubuzima rusange agamije gukumira ikwirakwira ry’iyi ndwara.
Nyuma y’urupfu rwe, inzego z’ubuzima muri Kenya zatangiye gukurikirana abantu bashobora kuba barahuye na we.
Abantu nibura 28, barimo abo mu muryango we n’abakozi bo kwa muganga, bamaze kumenyekana nk’abashobora kuba barahuye n’umurwayi. Hari kandi abandi bagenzi 23 ndetse n’abakozi bane b’indege bari kumwe na we mu rugendo, bakomeje gushakishwa no gukurikiranwa.
Uyu murwayi yari yavuye muri DRC akoresheje imodoka agera i Kampala muri Uganda, mbere yo gufata indege imuzana i Nairobi.
Iyi ndwara yatangiye kugaragara muri DRC muri Gicurasi 2026, nyuma iza no kugaragara muri Uganda, aho abantu babiri bapfuye. Uganda yatangaje ko nta Ebola ikihari muri Kanama, kuva icyo gihe abarwayi bashya bakaba baragaragaye muri RDC.
Icyorezo cyatewe n’ubwoko bwa Bundibugyo, bumwe mu bwoko bwa Ebola budakunze kuboneka. Ishami ry’Umuryango w’Abibumbye ryita ku buzima (WHO) rivuga ko hamaze kugaragara abantu 8,463 banduye ubu bwoko, muri bo 4,082 bakaba barapfuye.
Kugeza ubu nta rukingo cyangwa umuti wemewe wo kuvura Ebola yo mu bwoko bwa Bundibugyo uraboneka, nubwo hari imiti n’inkingo byagiye bigeragezwa.
Ifoto: France 24
