U Rwanda rwatoranyije filime ‘Ben’Imana’ yakozwe na Marie-Clémentine Dusabejambo ngo izaruhagararire mu cyiciro cya “Best International Feature Film” mu bihembo bya Oscars bizatangwa mu mwaka wa 2027.
Iri rushanwa ni irya filimi zikomeye ku isi zihemberwa ko zahize izindi mu myandikire, uko zakinnye n’uko zakunzwe.
Filimi izahagararira u Rwanda yiswe ‘Ben’Imana’, ikaba iherutse kuba nziza mu irushanwa ya Cannes 2026, icyo gihe yerekanywe mu cyiciro kiswe ‘Un certain régard’, inegukana igihembo cya Caméra d’Or gihabwa filime ya mbere yakozwe n’umuyobozi wa sinema, hamwe n’igihembo cya FIPRESCI gitangwa n’abanyamakuru bazi kujora sinema ngo bemeze ko ikozwe neza koko.
Kuba ‘Ben’Imana’ igiye guhatanira ibihembo muri Oscars ni intambe nziza kuri filime zakozwe n’Abanyarwanda kuko bizaziha uburyo bwo kwereka amahanga uko zikinwa n’ubuhanga buzirimo.
Mu minsi iri imbere nibwo hazatangazwa urutonde rw’izemejwe guhatanira iki gihembo.
Iyi filimi ishingiye ku mateka y’u Rwanda arimo kwibuka Jenoside yakorewe Abatutsi, ubutabera, imbabazi n’urugendo rw’ubwiyunge rwatangiriye ku nkiko Gacaca zashyizweho nyuma ya Jenoside kugira ngo zifashe mu butabera no kongera kubanisha Abanyarwanda.
Muri yo harimo inkuru ya Veneranda, umugore usaba imbabazi imbere y’abaturage mu rukiko Gacaca mu Mudugudu we.
Hari na Suzanne, murumuna we, ushaka ko abakekwaho kwica umugabo we n’umwana we bavugisha ukuri bakavuga uko byagenze.
Muri iyo nkuru harimo kandi Tina, umukobwa wa Veneranda, ugaragaza uburyo urubyiruko rutabonye Jenoside rukomeje kubaho mu ngaruka zayo ku miryango no ku gihugu.
Ibi bituma Ben’Imana itaba gusa filime ivuga ku mateka, ahubwo ibaza ikibazo gikomeye cy’uburyo igihugu gishobora gukira ibikomere bidakunze kuvugwaho, ikerekana uko ukuri, imbabazi n’ubutwari bw’abagore bishobora kuba umusingi w’ubwiyunge.
‘Ben’Imana’ yayobowe na Marie-Clémentine Dusabejambo, akaba ari na we wayanditse afatanyije na Delphine Agut.
Mu bakinnyi bayigaragaramo harimo Clémentine U. Nyirinkindi na Kesia Kelly Nishimwe.
Umuziki w’umwimerere w’iyi filime wakozwe n’umuhanzi nyarwanda Igor Mabano.
Marie-Clémentine Dusabejambo akunze kuvuga ko yakoze iyi filime agamije guha icyubahiro abagore b’Abanyarwandakazi, by’umwihariko abagize uruhare rukomeye mu bumwe n’ubwiyunge nyuma ya Jenoside yakorewe Abatutsi.
Kuri we, nubwo banyuze mu bikomere bikomeye, bagize ubutwari bwo gukomeza kubaho, gutanga imbabazi no gufasha umuryango kongera kwiyubaka.
