Abana Bari Mu Kaga Ko Kudakingirwa Indwara

Ishami ry’Umuryango w’Abibumbye ryita ku buzima, OMS/WHO, ryatangaje ko mu mwaka wa 2021 abana bangana na miliyoni 25 hirya no hino ku isi batigeze bakingirwa izindi ndwara kubera ko isi yose yari ihangayikishijwe no gukingira COVID-19.

Kuba abana batarakingiwe ziriya ndwara byashyize ubuzima bwabo mu kaga kiyongereye kuri COVID-`19 n’ingaruka yateje zirimo n’ubukene.

OMS/WHO ivuga ko icyateye abantu kudakingiza abana babo higanjemo kutibutsa ababyeyi amataliki yo gukingiza abana bigaterwa n’uko abantu bari bahangayikishijwe na COVID-19 cyane kurusha ibindi byose.

Raporo ya OMS/WHO ivuga ko umubare w’abana bagombaga guhabwa inkingo eshatu zuzuye z’indwara nka Diphtérie, iyitwa Tétanos n’imbasa wamanutse ku kigero cya   86 % mu mwaka wa 2019, ukomeza kumanuka ugera kuri   81 % mu mwaka wa  2021.

Umuyobozi wa UNICEF ku rwego rw’isi witwa Cathérine Russell avuga ko iriya mibare yerekana ko ubuzima bw’abana mu myaka iri imbere buzaba buri mu kaga.

Ati: “ Ni ikimenyetso gitukura cyerekana ko ibintu bizaba bibi ku bana mu myaka iri imbere kandi hirya no hino ku isi. Ibyo twabonye mu myaka mike ishize ni ubwa mbere tubibonye mu myaka icumi.”

Mu mwaka wa 2021 abana bagera kuri Miliyoni 25 ntibakingiwe urukingo  rumwe cyangwa inkingo nyinshi.

Aba bana biyongereyeho abagera kuri miliyoni ebyiri ugereranyije n’uko byagenze mu mwaka wa 2020.

Ugereranyije n’umwaka wa 2019, ubona ko uriya mubare wiyongereyeho abana miliyoni esheshatu.

Mu bana miliyoni 25 babaruwe, abagera kuri miliyoni 18 nta rukingo na rumwe bahawe.

Abenshi muri bo biganje mu bihugu bikennye, ingero zabyo zitangwa zikaba u Buhinde, Nigeria, Indonésie, Éthiopie N’Ibirwa bya Philippines.

Iseru: Indwara yiyongereye cyane mu bana…

Mbere y’uko umwaka wa 2021 utangira, abahanga mu by’ubuzima bizeraga ko ababyeyi bazitabira gukingira abana babo ku bwinshi.

Icyakora ngo siko byagenze kubera ko ababyeyi bahise bahura n’ibibarangaza birimo kureba uko bakwiyubaka mu bukungu, abandi barangamira kwikingiza cyangwa gukingiza ababo COVID-19…biza gutuma hari indwara zirengagizwa.

Uku kwirengagizwa kwabaye hirya no hino ku isi.

Mu mwaka wa 2021 abana Miliyoni 24,7 ntibigeze bakingirwa iseru.

Biyongereyeho abana miliyoni eshanu ugeranyije n’uko imibare yaberekanaga mu mwaka wa 2019.

Andi makuru mabi ni uko hari abantu bagera kuri miliyari eshatu  z’abantu batuye isi batigeze bahabwa urukingo na rumwe rwa COVID-19.