Ikigo cy’Igihugu cy’Ubuzima, RBC, cyatangaje ko kigiye gupima icyorezo za COVID-19 mu bantu bagera ku 2000, hasuzumwa urwego kiriho mu Mujyi wa Kigali.

Ni uburyo bumaze kumenyerwa, bukorwa inshuro nyinshi hagamijwe kureba niba icyorezo kitaba kirimo gukwirakwira mu baturage mu buryo butazwi, nubwo imibare y’ababa bapimwe hakoreshejwe uburyo busanzwe iba igaragaza ko ubwandu ari buke.

Hapimwa abantu batoranywa mu buryo bwa tombola, batoranywa mu mirimo itandukanye cyangwa imodoka z’abagenzi. Igereranya ry’ubukana bw’icyorezo rishingira ku mubare w’abanduye ugereranyije n’abapimwe.

RBC yatangaje binyuze kuri Twitter iti “Ubu turi mu gikorwa cyo gupima COVID-19 (mu buryo bw’inyigo) abakoresha imihanda y’Umujyi wa Kigali kugirango tugire ishusho y’icyorezo mu murwa. Iki gikorwa gisanzwe kimenyerewe ku izina rya Drive Through. Kugeza ku cyumweru tariki 28.03.202, turateganya gupima abagera ku 2,000.

Kugeza ubu mu Rwanda abamaze kwandura COVID-19 ni 21210, abakirwaye ni 1372.

U Rwanda rukomeje gutanga inkingo za COVID-19 nk’uburyo bwagabanya igitutu cy’iyi ndwara ku rwego rw’ubuzima, kuko urukingo rurinda umuntu kuzahazwa na COVID-19. Hamaze gukingirwa abantu 348.926.

Abamaze kwicwa n’iki cyorezo mu Rwanda ni 298.