Menu
Indimi
Advert

Mu Rwanda

Bahaye Umupolisi Ruswa Ya Frw 70 000 Arabyanga Barafungwa

Yanditswe kuwa

Mu karere ka Gicumbi hari abasore babiri bafunzwe bakurikiranyweho guha umupolisi ruswa ya Frw 70 000 ngo abahe udupfunyikwa tw’ikiyobwabwenge kitwa Mayirungi cyari cyafatiwe mu murenge wa Rutare.

Bariya basore bafatiwe mu cyuho tariki 26, Mata, 2021 bafatirwa mu murenge wa Rutare mu Karere ka Gicumbi, mu Kagari ka Gacyamo.

Umuyobozi wa Polisi mu Karere ka Gicumbi, Superintendent of Police(SP) Jean Bosco Minani  yavuze ko  tariki ya 26 Mata abapolisi bakorera muri sitasiyo ya Polisi ya Rutare bafatiye kiriya kiyobyabwenge mu  gikorwa cyo kurwanya ibiyobyabwenge bari bamazemo iminsi.

Baje gutesha   abantu  udupfunyika 251  tw’ikiyobyabwenge  cya Mayirungi.

Hashize igihe gito haza abagabo babiri bashaka gutanga ruswa ngo basubizwe icyo kiyobyabwenge.

SP Minani yagize ati: “Ku isaha ya saa saba z’amanywa abapolisi bahagaritse  abantu bari bafiteho amakuru ko  bafite ibiyobyabwenge  ariko banga guhagarara bariruka,  mu kwiruka bataye udupfunyika 251 tw’ikiyobyabwenge cya  mayirungi. Abapolisi barayifashe barayijyana bigeze ku mugoroba nibwo babiri muri bo baje gutanga ruswa kugira ngo bahabwe cya kiyobyabwenge.”

SP Minani avuga ko bariya bantu baje bavuga ko  batumwe na nyiri ibiyobyabwenge  uba mu Mujyi wa Kigali.

 Babanje guhamagara umupolisi wari wafashe kiriya kiyobyabwenge bamubwira ko bagiye kumuzanira amafaranga y’u Rwanda ibihumbi 70 akabaha icyo kiyobyabwenge ngo kidakomeza kwangirika. 

Uwo mupolisi yarabemereye bazana ayo mafaranga ariko yari yavuganye na bagenzi be aho bagiye guhurira, babaye hafi  aho babafatira mu cyuho barimo gutanga ya ruswa.  

Umuyobozi wa Polisi mu Karere ka Gicumbi yongeye gukangurira abaturage kwirinda ibiyobyabwenge ndetse no kwijandika mu byaha bya ruswa.

Ati: “ Duhora dukangurira abantu kwirinda kwishora mu byaha, bariya baravuga ko ari uwari abatumye gutanga ruswa  ko ataribo ba nyiri ibiyobyabwenge ariko baremera ko bakoreshejwe mu gutanga ruswa kugira ngo birekurwe. Abantu bagomba kumenya ko ruswa  ari icyaha ubugerageje iyo abihamijwe n’amategeko arabihanirwa, abantu bamenye ko  Polisi ari urwego rushinzwe kurwanya ruswa bityo abishuka ko bashobora guha ruswa umupolisi baribeshya  ahubwo  bazajya bahita bafatwa.”

Ku rubuga rwa Polisi y’u Rwanda  handitse ko abafashwe  bahise bashyikirizwa Urwego rushinzwe ubugenzacyaha(RIB) rukorera muri sitasiyo ya Polisi ya Rutare kugira ngo hatangire iperereza.

Tanga igitekerezo

Tanga igitekerezo

Your email address will not be published. Required fields are marked *

Advertisement
Advertisement
Advertisement
Advertisement
Advertisement
Advertisement
Advertisement Enter ad code here