Nyuma y’uko hari abakozi batatu bo mu Biro Bya Perezida Museveni bapimwe bagasanganwa ubwandu bwa COVID-19 ubwo bari bavuye i Dubai, Abu Dhabi na Addis Ababa, Umuganga we bwite yavuze ko nawe agomba kongera kuyisuzumwa.

Bariya bakozi bari bavuye  muri Leta zunze ubumwe z’Abarabu aho bari baraherekeje Perezida Yoweli Museveni  mu muhango wo gufungura imurikagurisha mpuzamahanga riri kuhabera.

Ni imurikagurisha rizamara amezi atandatu, Uganda ikaba ihafite icyumba imurikiramo ibyo ikora.

Umuganga bwite wa Perezida Museveni witwa Dr Joseph Okiria yaraye yanditse kuri Twitter ko bariya bakozi basanzwemo ubwandu bwa kiriya cyorezo ubwo bari bakubutse mu ruzinduko bari bajyanyemo n’Umukuru wa Uganda.

Yanditse ati: “ Nyuma y’uruzinduko bari bajyanyemo na Perezida i Dubai, Abu Dhabi bagaca no muri Addis Ababa, abakozi batatu bo mu Biro by’Umukuru w’igihugu basanganywe ubwandu bwa COVID-19.”

Okiria  yavuze ko abagaragaweho ubwandu bashyizwe mu kato.

Dr Joseph Okiria yunzemo ko  nyuma y’uko bariya bakozi bapimwe bikagaragara ko banduye, na Perezida Museveni yarapimwe basanga ataranduye, ariko ngo agomba kongera gupimwa.

Muri iki gihe abaturage ba Uganda ntibari kwandura kiriya cyorezo cyane kuko umubare w’abandura ku munsi uri munsi y’abantu ijana.

Minisiteri y’ubuzima ya Uganda yatangaje ko kuri uyu wa Gatanu umubare w’abanduye kiriya cyorezo mu gihugu hose ari abantu 124,437 kuva kiriya cyorezo cyagera yo muri Werurwe, 2020.

Kimaze guhitana abantu 3,172 abagera ku 96,237 baragikize.