Urukiko  rw’Uburundi rwaraye rwumvise ikirego gitangwa n’ubushinjacyaha cy’uko Alain-Guillaume Bunyoni  wahoze ari Minisitiri w’Intebe yakoze umugambi wo guhitana Perezida Evariste Ndayishimiye.

Urubanza rwa Bunyoni rwatangiye neza ku wa Mbere taliki 06, Ugushyingo, 2023.

Mu byo ubushinjacyaha bwaraye bumushinje harimo no kugambirira guhitana Perezida Evariste Ndayishimiye.

Aregwa kandi gutunga intwaro mu buryo butemewe n’amategeko.

Ibi byose ariko arabihakana.

Aregwa kandi gutuka Perezida Ndayishimiye na  Minisitiri w’Intebe witwa  Gervais Ndirakobuca.

Mu kurambura ibirego bumurega, ubushinjacyaha buvuga ko iwe bwahasanze n’amafaranga menshi y’abanyamahanga, bukabiheraho buvuga ko yari agamije no guhungabanya ubukungu bw’Uburundi.

Alain Guillaume Bunyoni ashinjanwa n’abandi bantu batandatu, amategeko akaba avuga ko aramutse ahamwe n’ibyo aregwa yahanishwa gufungwa burundu.