Umunyamabanga Mukuru w’Umuryango w’Ibihugu bikoresha Icyongereza (Commonwealth), Shirley Ayorkor Botchwey, yashimiye Perezida Paul Kagame n’Abanyarwanda ku masezerano y’imyaka 10 u Rwanda rwasinye yo kwakira isiganwa rya Formula 1, African Grand Prix.
Botchwey yavuze ko ayo masezerano ari intambwe ikomeye ku Rwanda ndetse akaba ari n’igihe cyihariye mu mateka y’umukino wo gusiganwa ku modoka muri Afurika.
Mu butumwa yatanze mu izina rya Commonwealth, yavuze ko ayo masezerano azatuma amarushanwa ya Formula 1 agaruka ku mugabane wa Afurika, nyuma y’imyaka myinshi atahabera.
Ubwo aheruka kuhabera hari mu mwaka wa 1993 akaba yarabereye muri Afurika y’Epfo ahitwa Kyalami.
Biteganyijwe ko isiganwa rizatangira mu ntangiriro ya 2030, bivuze ko rizaba rigiye kuba nyuma y’imyaka hafi 40 ribereye muri Afurika.
Amasezerano u Rwanda rwasinye ateganya ko ruzakira iri rushanwa mu gihe cy’imyaka 10, rikazabera ku kibuga cyabugenewe kizubakwa mu Karere ka Bugesera, mu Majyepfo y’Umujyi wa Kigali.
U Rwanda rwabaye umunyamuryango wa Commonwealth mu 2009, rukaba ruri mu bihugu byo muri Afurika bigize uyu muryango.
Ibi bituma uruhare rw’u Rwanda mu kugarura iri rushanwa muri Afurika runagira igisobanuro cyihariye mu mubano warwo n’uyu muryango.
