Umukire w’Umunyafurika w’umwirabura wa mbere ku isi, Aliko Dangote, yashyize abakobwa be mu myanya ikomeye mu itsinda ry’ubucuruzi bwe mpuzamahanga bufite agaciro ka miliyari nyinshi z’amadolari, nk’uko THISDAY yabitangaje ku wa Mbere.
Halima Aliko Dangote yagizwe Umuyobozi Mukuru w’Itsinda ushinzwe Ibiro by’Umuryango w’ubucuruzi wa Dangote n’Ibiro Mpuzamahanga (Dubai na London).
Halima azakomeza kuyobora ishyirwaho n’iterambere ry’Ibiro by’Umuryango wa Dangote i Dubai, anemeze ko imiyoborere yabyo, uburyo bikoramo, amategeko ngengamikorere n’imiterere y’inzego byazo bigera ku rwego rwuzuye.
Byongeye kandi, azafata inshingano zuzuye zo kugenzura ibikorwa by’ibiro by’i Dubai n’i London, binyuze mu gushyira imbere imiyoborere ihamye y’iryo tsinda, kunoza imikorere, gukoresha neza umutungo no kubahiriza amategeko muri ibyo biro byombi.
Nanone kandi, inshingano ze zirimo gushimangira no gushyira mu bikorwa amahame y’imiyoborere yo ku rwego mpuzamahanga, no kwemeza ubufatanye bunoze hagati y’inzego zose zishyigikira ibikorwa mpuzamahanga by’itsinda ayoboye.
Nk’uko THISDAY yabitangaje, iri shyirwaho rigaragaza ubushake bw’isosiyete bwo gutegura abasimbura, kuramba kw’ibigo bya Dangote no gucunga neza umutungo, hagamijwe ko igisekuru gikurikira cy’abayobozi ba Dangote kirushaho gushimangira imiyoborere, imyitwarire n’ubushobozi bw’inzego z’Ikigo cye.
Itangazo ribivuga, ryavuze ko amasezerano yashyizweho azafasha itsinda kubona ibikoresho byinshi bigezweho by’ubwubatsi bizafasha mu mishinga iri gukorwa n’iteganyijwe mu bijyanye no gutunganya peteroli, inganda zikora ibikomoka kuri peteroli, ubuhinzi n’ibikorwa remezo binini.
Itsinda ryongeraho ko ibyo bikoresho bishya biziyongera ku bisanzwe biri gukoreshwa mu kwagura uruganda rutunganya peteroli, biteganyijwe ko ruzarangira mu myaka itatu iri imbere.
Uretse gutunganya peteroli, iyi sosiyete yavuze ko gahunda yo kwagura ibikorwa izatuma umusaruro wa polypropylene (ikinyabutabire gikoreshwa no mu nganda z’imyenda) wiyongera ukava kuri toni ibihumbi 900 ku mwaka ukagera kuri toni miliyoni 2.4 ku mwaka.
Yanavuze ko ubushobozi bwo gutunganya ifumbire ya Urée muri Nigeria buzazamurwa bukava kuri toni miliyoni 3 ku mwaka bukagera kuri toni miliyoni 9 ku mwaka, hiyongereyeho ubushobozi bwa toni miliyoni 3 ku mwaka muri Ethiopia, bityo itsinda rikakomeza kuba uruganda rwa mbere ku isi mu gukora ifumbire ya Urée.
Dangote Group yavuze kandi ko ubushobozi bwo gukora ikinyabutabire Linear Alkyl Benzene (LAB) buzazamurwa bukagera kuri toni 400,000 ku mwaka, bigatuma Itsinda riba irya mbere muri Afurika rigikora.
Linear Alkyl Benzene ni ikinyabutabire gikoreshwa mu nganda zikora ibikoresho by’isuku bisukura mu bice birimo ubwogero n’ubwiherero n’amasabune y’ubwoko binyuranye.
Yanagaragaje ko kongera ubushobozi bwo gukora amavuta shingiro (base oil) nabyo biri muri gahunda rusange yo kwagura ibikorwa by’iki kigo.
Muri iryo tangazo, itsinda ryasobanuye ko hari amasezerano ryagiranye n’isosiyete y’Abashinwa kandi ko arimo ishoramari ry’ingenzi rigamije kwagura ibikorwa byaryo mu bwubatsi no kwihutisha intego yo kubaka ikigo gifite agaciro ka Miliyari 100 z’amadolari bitarenze umwaka wa 2030.
Iryo tangazo ryagize riti: “Ibikoresho by’inyongera tugiye kubona muri ubu bufatanye bizazamura cyane ubushobozi bwo gushyira mu bikorwa imishinga yacu. Binyuze muri iri shoramari, turimo kwiyubaka kugira ngo tube sosiyete ya mbere y’ubwubatsi ku isi.”
Dangote Group ubu iri kwihutisha gahunda yo kwagura ibikorwa no guteza imbere amasoko yo mu karere mu gihe igana ku ntego yayo y’igihe kirekire yo kubaka ikigo gifite agaciro ka miliyari 100 z’amadolari bitarenze umwaka wa 2030.
Ikigo Dangote Group cyashoye mu bintu bikurikira:
Inganda z’ifumbire n’amabuye y’agaciro
Dangote yashoye mu nganda z’ifumbire muri Nigeria, zifasha mu buhinzi no gutanga ifumbire ku isoko rya Afurika yose.
Yanaguzemo imigabane mu bikorwa byo gutunganya amabuye y’agaciro n’ubucukuzi bwa petelori.
Inganda z’ifu n’umuceri
Afite ibikorwa byo gutunganya ibiribwa n’ifu muri Nigiria ndetse no mu bindi bihugu bya Afurika y’Uburasirazuba.
Inganda z’ubwubatsi
Yashoye mu gukora sima aho Dangote Cement ikorera mu bihugu birenga 10 muri Afurika nka Nigeria, Ghana, Ethiopia, Zambia na Congo-Kinshasa.
Yashoye mu bikorwaremezo biyungurura peteroli bikorera muri Nigeria.
Ubucuruzi n’ishoramari ryo hanze ya Afurika
Nubwo ibikorwa bye bikomeye cyane biri muri Afurika, Dangote yagiye ashyira amafaranga mu mishinga yo kwagura isoko rye ku isi, cyane cyane mu bucuruzi bw’ibikomoka ku mazi, ifumbire n’ibiribwa.
Afite ubucuruzi muri Dubai muri Leta ziyunze z’Abarabu cyane cyane mu by’inganda n’ubucuruzi bw’ibiribwa.
