Minisitiri w’ubuzima Samuel Roger Kamba Mulamba avuga ko ubuyobozi buri gucungira hafi ubwiyongere bw’indwara ‘itazwi’ imaze iminsi iri ahitwa Panzi, imaze kwica abarenga 100 mu gihe gito.
Nk’ubu hari abantu 25 baherutse gupfira muri kariya gace mu masaha make ashize.
Kamba Mulamba avuga ko n’ubwo ibintu ari uko byifashe, ku rundi ruhande, Leta iri gucungira hafi kandi ko ‘bitakwemezwa’ ko abapfa bose bazira iriya ndwara.
Yavuze ko hari ibipimo biherutse koherezwa mu nzu z’ubushakashatsi kugira ngo hasuzumwe icyise abo bantu, harebwa nibo bose bazira iyo ndwara itaramenywa izina n’ikiyitera.
Ku rundi ruhande, Leta ivuga ko iri gufata ibipimo hirya no hino mu baturage kandi hakabaho n’ubukangurambaga bwo kugira isuku n’izindi ngamba z’isuku.
Ibimenyetso by’iyi ndwara birimo ibicurane bikomeye, umuriro, kubura amaraso ahagije, kubabara umutwe n’ibindi.
Abana nibo bibasiwe nayo kandi izahaza kandi igahitana abafite imyaka itanu, kandi ifite ubukana bwa 40% bwo kuzahaza abo yafashe bose.
Kuri X, Minisiteri y’ubuzima iherutse kuvuga ko iyo ndwara yamenyekanye guhera ku tariki 24 Ukwakira, 2024, benshi mu bo imaze kwica bakaba ari abana.
Repubulika ya Demukarasi ya Congo imaze igihe ihangana n’ikiza cya virusi y’ubushita bw’inkende (cyangwa ‘mpox’).
Hagati ya Mutarama na Nyakanga uyu mwaka, abategetsi babaruye abantu hafi 14,500 banduye iyo virusi.
