Ku nshuro ya kabiri nyuma yo kuva ku izima, Minisitiri w’ubutabera muri Guverinoma ya Repubulika ya Demukarasi ya Congo, Constant Mutamba, yongeye kwitaba ubutabera, abazwa iby’inyerezwa rya Miliyoni $19 zari zigenewe kubaka gereza ya Kisangani zikaburirwa irengero.
Kuri uyu wa Gatanu tariki 06, Kamena, 2025 nibwo yageze mu Biro by’Umushinjacyaha mukuru aherekejwe n’abari baje kumushyigikira, bari mu bemeza ko abeshyerwa.
Bakigera ku Biro by’umushinjacyaha, bahise bakwizwa imishwaro na Polisi yabarashe ibyuka biryani mu maso.
Umushinjacyaha mukuru witwa Sylvain Kalwila niwe wahase Mutamba ibibazo amubaza iby’irengero ry’ayo madolari, bivugwa ko yarigishijwe bitewe n’imitangire idahwitse y’isoko ryo kubaka iriya gereza.
Radio Okapi ivuga ko kubaza Constant Mutamba byamaze amasaha umunani.
Ibazwa rye rije nyuma y’uko Inteko ishinga amategeko yemereye ubutabera gutangira kubaza Mutamba iby’ayo mafaranga.
Ni icyemezo cyafashwe tariki 29, Gicurasi, byemejwe n’Inteko ishinga amategeko ya Repubulika ya Demukarasi ya Congo iyoborwa na Vital Kamerhe.
Ku wa Mbere Tariki 09, Kamena, 2025 nibwo ibazwa rizakomeza ku nshuro ya gatatu.
Ibizava mu ibazwa rya Minisitiri Constant Mutamba nibyo bizagena ikizakurikiraho mu iperereza ku irengero ry’ariya madolari menshi.
Nibigaragara ko nta ruhare na mba Mutamba yabigezemo, dosiye izashyingurwa burundu, ariko nibigaragara ko hari uruhare runaka yabigezemo, Ubushinjacyaha bukuru buzasaba Inteko ishinga amategeko uburenganzira bwo kumukirikirana ku rwego rwisumbuyeho.
Mutamba ni umunyapolitiki ukomoka ahitwa Lomami muri Repubulika ya Demukarasi ya Congo akaba afite imyaka 37 y’amavuko.
Ibyo ubushinjacyaha bumurega, yabihakanye kenshi, akemeza ko ikigamijwe ari ukumusiga ibara kandi arengana.
Mu mpera za Gicurasi, Mutamba yari yatumijwe n’Umushinjacyaha mukuru, amusubiza ko adashobora kumutumiza ngo yisobanure mu gihe nawe[uwo mushinjacyaha] hari ibyo akekwaho mu nkiko.
Icyo gihe Minisitiri Constant Mutamba yabwiye Radio Okapi ati: “Mubwire Umushinjacyaha w’urwo rukiko ko atazigera na rimwe ambona imbere ye nisobanura. We ubwe hari amakosa akomeye yakoze bityo rero nta burenganzira afite bwo gutumiza Minisitiri w’ubutabera ngo amwitabe, agire icyo yisobanura. Niteguye kutamwitaba ndetse no kuzahangana n’ingaruka bizateza”.
Mutamba avuga ko ibiri gukorwa n’uriya mushinjacyaha biri mu rwego rwo kumusiga icyasha no kumusebya kandi ari Umuyobozi wa Minisiteri iri mu zikomeye mu gihugu.
