Ubutegetsi bw’Intara ya Tigray, mu Majyaruguru ya Ethiopia, bwatangaje ko ingabo zabwo zinjiye mu ntambara yo kwirwanaho zihanganye n’ingabo za Leta, mu gihe amakimbirane hagati y’impande zombi yongeye kuzamuka.
Mu itangazo ryasohowe kuri uyu wa Gatatu, ubuyobozi bwa Tigray bwavuze ko abarwanyi babwo batangiye ibikorwa byo kwirwanaho nyuma y’uko ingabo za Tigray zigaruriye ikibuga cy’indege gikomeye cyo muri iyo ntara.
Ibi bibaye mu gihe hari ibimenyetso by’uko umwuka w’ubwumvikane buke hagati ya Tigray na Guverinoma nkuru ya Ethiopia umaze iminsi wongera gukaza umurego.
Reuters yanditse ko kugeza ubu, Guverinoma ya Ethiopia nta cyo iratangaza ku itangazo rya Tigray cyangwa ku makuru avuga ko ikibuga cy’indege cyafashwe.
Amateka y’amakimbirane ya Tigray
Tigray ni Intara iherereye mu Majyaruguru ya Ethiopia hafi y’imipaka ya Eritrea na Sudan.
Ni yo yabereyemo intambara ikomeye hagati ya Guverinoma ya Ethiopia n’ingabo z’umutwe wa Tigray People’s Liberation Front (TPLF) kuva mu 2020 kugeza mu 2022.
Iyo ntambara yatangiye nyuma y’uko umubano hagati ya Guverinoma ya Minisitiri w’Intebe Abiy Ahmed na TPLF urushijeho kuzamba.
Intambara yamaze hafi imyaka ibiri, ituma abantu benshi bahunga ingo zabo ndetse n’ubutabazi ku bafite ibibazo buragorana kubera imiterere y’aho bahungiye.
Mu Gushyingo(11) 2022, impande zombi zasinye amasezerano y’amahoro azwi nka Pretoria Agreement, agamije guhagarika imirwano no kugarura amahoro muri Tigray.
Nubwo ayo masezerano yahagaritse imirwano ikomeye, hari ibibazo bitarakemuka burundu, birimo intwaro zari zikuri mu maboko y’abarwanyi ba Tigray, imitungo n’ubutaka by’abaturage bahunze, ndetse n’umutekano w’uturere tumwe na tumwe.
Amakuru mashya aturutse muri Tigray yongera gutera impungenge ko amakimbirane ashobora gusubira ku rwego rw’imirwano ikomeye. Ibi bishobora kugira ingaruka ku baturage basanzwe batarakira neza ingaruka z’intambara yabaye hagati ya 2020 na 2022.
Kugeza ubu, haracyategerejwe ibisobanuro birambuye bya Guverinoma ya Ethiopia ku byabaye ndetse n’uko izitwara ku itangazo ry’ubuyobozi bwa Tigray rivuga ko bwinjiye mu ntambara yo kwirwanaho.
