Ishyirahamwe ry’Umupira w’Amaguru mu Rwanda ryatangaje ko umubare w’abanyamahanga bifashishwa ku mukino muri Shampiyona y’uyu mwaka bava kuri batandatu bakaba umunani.
Biri mu itangazo ryagenewe abanyamakuru, riri ryasohowe ku wa Kabiri, tariki ya 9, Nzeri 2025.
Ikindi FERWAFA yamenyesheje abo bireba ni uko guhera mu mwaka utaha w’imikino, buri kipe izajya itanga Frw 2,000,000 yo kwandikisha umukinnyi w’umunyamahanga mushya.
Ibindi ni uko guhera muri uwo mwaka buri kipe igomba kuzajya ishyira abakinnyi batatu bari munsi y’imyaka 21 ku rupapuro rw’umukino.
FERWAFA yatangaje ko ifatanyije na Rwanda Premier League, Izajya igena ibiciro byo kwinjira ku mikino ya shampiyona, mu gihe zari inshingano zakorwaga n’amakipe yakiriye umukino.
