Abakora mu nzego z’ubuzima muri Guinea baratangaza ko hari umuntu wahitanywe n’indwara iterwa na Virusi yitwa Marburg kandi ngo iyi ndwara nidakumirwa hakiri kare ishobora kuzaba icyorezo kimwe na Ebola.
Abakora mu Ishami ry’Umuryango w’Abibumbye rishinzwe ubuzima( WHO) bavuga ko guhagarika ubwandu bushya bw’iriya ndwara bigomba gukorwa vuba kuko iramutse ikwiye mu bantu benshi, ishobora kuba icyorezo nk’uko Ebola ijya ibigenza.
Bivugwa ko indwara ya Marburg ari indwara yandura vuba cyane nk’uko bigenda kuri Ebola.
Virusi zitera izi ndwara ziri mu bwoko bumwe.
Virus ya Marburg igera mu bantu iturutse ku ducurama, hanyuma abantu bakayihererekanya binyuze mu gukorana ho bamwe bakaba bayanduza abandi binyuze mu matembuzi aturuka mu mubiri.
Ayo matembabuzi arimo n’icyuya.
Ni indwara ikomeye kuko yica kandi mbere y’uko umurwayi apfa yerekana ibimenyetso birimo no kuva amaraso aciye mu twenge hu.
Dr Matshidiso Moeti wo mu Ishami ry’Umuryango w’Abibumbye rishinzwe ubuzima( WHO) avuga ko iriya ndwara yandura vuba cyane kandi ikaba yagera ku bantu benshi mu gihe gito.
Abantu bose bahuye n’uwanduye bari gushakishwa kugira ngo bitabweho kandi babuzwe kuba bakwanduza abandi.
Iyi ndwara iramutse ihindutse icyorezo, yaba ije mu gihe kibi kuko n’ubusanzwe hari icyorezo cya COVID-19.
