Menu
Indimi
Advert

Mu mahanga

HRW ivuga ko impunzi 18 z’Abarundi zaburiwe irengero muri Tanzania

Yanditswe kuwa

Raporo yatangajwe n’Ikigo mpuzamahanga kivugira uburenganzira bwa muntu, Human Rights Watch, itangaza ko muri 2019 hari Abarundi 18 bari impunzi mu nkambi za Tanzania barigishijwe.

Abakoze iriya raporo bavuga ko bamwe muri bariya Barundi bakorewe iyicarubozo ubwo bari bafungiwe kuri station ya Polisi ya Kibondo muri Tanzania.

Barindwi mu bavugwa muri iriya raporo baburiwe irengero, abandi batatu barekurwa nyuma y’ibyumweru byinshi bamaze muri kasho baranegekaye.

Abandi Barundi icyenda bari kumwe na bariya, baje kurekurwa bahabwa abayobozi b’u Burundi barataha ariko bageze iwabo nabwo barafungwa.

Iriya raporo ivuga ko Leta y’u Burundi yakoranye n’iya Tanzania mu gufunga ziriya mpunzi zitagejejwe mu nkiko.

Abakoze ubushakashatsi kuri kiriya kibazo bakabutangaza muri raporo yabo bavuga ko ziriya mpunzi zacyuwe iwabo ku ngufu kandi ngo nyuma yo kugera yo zakomeje gutotezwa n’ubutegetsi bwa Perezida Evariste Ndayishimiye.

Muri Tanzania habarurwa impunzi z’Abarundi 150 000 zahunze kiriya gihugu muri 2015 nyuma y’imidugararo yakurikiye amatora y’Umukuru w’Igihugu yatsinzwe na nyakwigendera Pierre Nkurunziza ariko ntavugweho rumwe.

Uburundi buherutse kuvuga ko Ibiro by’Umuryango w’Abibumbye muri kiriya gihugu bigomba gufunga kuko bitagikenewe.

Uburundi na Tanzania byarakoranye mu kubona amakuru aberekeyeho…

Raporo ya Human Rights Watch ivuga ko kugira ngo abayobozi bo muri Tanzania babone amakuru kuri ziriya mpunzi byasabye ko bakorana n’u Burundi.

Ikomeza ivuga ko nyuma yo kubabona ho amakuru, abapolisi ba Tanzania batangiye kubaza ziriya mpunzi ibyo zavugwagaho n’abategetsi bo mu Burundi.

Muri iryo bazwa hari bamwe bakorerwaga iyicarubozo ririmo kubazwa bamanitswe ku migozi, abandi bakicazwa mu mazi arimo urusenda n’ibindi.

Umuyobozi w’Ishami rya HRW muri Afurika  witwa Mausi Segun avuga ko ririya totezwa ryatangiye mu gihe kwiyamamaza byari birimbanyije mu matora y’Umukuru w’Igihugu cy’u Burundi aheruka.

Ikigo Human Rights Watch gikorera i New York muri Leta Zunze ubumwe bw’Amerika kikaba kizwi ho gukorera ubuvugizi impunzi, abagororwa, abana n’abagore baba barambuwe uburenganzira n’inzego runaka, zaba iza Leta, iziyishamikiyeho n’iz’abikorera ku giti cyabo.

Mausi Segun

Ivomo:Al Jaazera

Taarifa Rwanda

Tanga igitekerezo

Tanga igitekerezo

Your email address will not be published. Required fields are marked *

Advertisement
Advertisement
Advertisement
Advertisement
Advertisement
Advertisement