Ikipe y’igihugu y’u Rwanda y’abagore bafite ubumuga bakina Sitting Volley yatangiye imikino Paralempike 2024 itsindwa na Brazil amaseti 3-0. Ni umukino waraye ubaye kuri uyu wa Kane, ukaba uwa mbere ukinwe muri iri tsinda rigizwe na Brazil, Slovenia, Canada n’u Rwanda.
Iri rushanwa riri kubera mu Bufaransa.
Abanyarwandakazi ntibatinze gutsindwa kuko iseti ya mbere bayitsinzwe byihuse ku manota 25 kuri 13 kandi yose uko ari atatu yarangiye nta seti n’imwe u Rwanda rwagizemo amanota 15!
Iya kabiri yo rwagize amanota 10, iya gatatu rugira amanota arindwi.
Ikipe ya Brazil ya Sitting Volley ikomeye mu buryo bwose haba mu bagore no mu bagabo kuko ku rwego rw’isi iri ku mwanya wa kabiri nk’uko biherutse gutangazwa na Federasiyo mpuzamahanga ya Sitting Volleyball yitwa World Paravollley.
Kuri uyu wa Gatandatu nibwo u Rwanda ruri bwongere gukina ruhure na Slovenia.
Umukino wa nyuma mu matsinda uteganyijwe taliki 02, Nzeri, 2024 ukazaruhuza na Canada.
