Iyi Banki y’ubucuruzi yatangaje ko mu mwaka wa 2022 yinjije miliyari Frw 42,4 bingana n’izamuka rya 27% ugereranyije n’uko byari bimeze mu mwaka wa 2021.

Iyo nyungu yayikuye muri serivisi yatanze ugereranyije n’inyungu yungukiye abakiliya bayo.

Ni inyungu  yazamutse ho 19%.

Abahanga mu mibare biriya Banki bavuga ko  yaturutse mu bikorwa  by’ivunjisha ryabaruwe ku kigero cya 25% bishingiye mu gutanga serivisi nziza no kwagura ibikorwa.

Banki kandi yashyizeho imikorere yubakiye ku bakiliya bayo no kwimakaza ikoranabuhanga.

Iryo koranabuhanga ryatumye byibura 78% ry’ihererekanya ry’amafaranga ryarakorewe muri iriya Banki ryarakozwe binyuze mu ikoranabuhanga.

Banki ya I&M ivuga ko mu mwaka wa 2022 ibikorwa byayo byose byakoresheje miliyari Frw 25.6 ugereranyije na miliyari Frw 20.7 zakoreshejwe mu mwaka wa 2021.

Ibi byatewe no kongera ubushobozi mu ikoranabuhanga ndetse n’izamuka ry’ibiciro ku isoko.

Banki ya I&M yatangaje ko  inguzanyo zitishyurwa neza zingana na miliyari Frw 3.3 zivuye kuri miliyari 1.4 mu mwaka wa 2021.

Ubuyobozi bw’iyi Banki buvuga ko  byatewe  ahanini n’ihindagurika ry’ubukungu muri rusange.

Iyi banki kandi ivuga ko nyuma yo kwishyura imisoro yose,  yungutse miliyari Frw 9.3.

Inguzanyo yahaye abakiliya, zazamutseho 4%, uyu mubare ukaba ungana na miliyari Frw 231, zivuye kuri miliyari 222 zabaruwe mu Ukuboza, 2021.

Ibi byatewe ahanini kandi  n’inguzanyo nshya Banki yatanze ku bakiliya bayo bo mu byiciro bitandukanye.

Inguzanyo zitishyurwa neza zo zingana na 4.2%.

Impapuro mpeshwamwenda zarazamutse zigera kuri miliyari Frw 136.9 zivuye kuru miliyari Frw 91.5 mu Ukuboza, 2021, iri zamuka rikaba ryarajyanye ni ingamba zo gukoresha neza imari shingiro.

Amafaranga yabikijwe n’abakiliya ndetse n’ibigo bitandukanye yazamutseho 9% agera kuri miliyari Frw 357.4 avuye kuri miliyari Frw 327 zabonetse mu mwaka wa 2021 mu ukwezi k’Ukuboza, 2022.

Imyenda y’igihe kirekire iyi Banki yari ifitiye ibindi bigo by’imari ingana na Miliyari Frw 47.5.