Minisitiri w’Ubuzima Dr Ngamije Daniel yatangaje ko gahunda yo gukingirira abantu aho bategera imodoka yatekerejweho hagamijwe kurushaho kwegera abaturage, nyuma y’uko umuvuduko wo kwikingiza COVID-19 muri Kigali wasaga n’uwagabanyutse.
Ikigo cy’Igihugu Gishinzwe Ubuzima (RBC) giheruka gutangaza ko guhera ku wa Kabiri tariki 16 Ugushyingo 2021, umuntu wese ufite imyaka 18 kuzamura wacikanwe no guhabwa urukingo rwa COVID-19, “ashobora gukingirwa muri gare ya Nyabugogo, Nyarugenge, Nyanza, Remera na Kimironko.”
Mu butumwa yanyujije kuri Twitter, Minisitiri Ngamije yasobanuye impamvu iki cyemezo cyafashwe.
Ati “Mu byumweru bibiri bishize muri Minisiteri y’Ubuzima twagowe no kurenga abantu 93% bakingiwe mu bafite imyaka 18 kuzamura muri Kigali! Mu gutekereza kure, komite ishinzwe iby’ikingira yafashe icyemezo cyo kwifashisha indi gahunda! Kwegera abagenerwabikorwa aho bategera imodoka muri Kigali… Ubwitabire buratangaje.”
#MOHRwanda two weeks ago we struggled to cross 93%Covid19 vaccination rate among 18 years old and above in Kigali!Thinking beyond box #Vaccination steering committee decided catchup plan strategy!Meet clients near Bus stations in Kigali..Amazing attendance @CityofKigali pic.twitter.com/6UQr4QWaBZ
— Dr. Ngamije Daniel (@DrDanielNgamije) November 18, 2021
RBC kandi iheruka gutangaza ko mu gihugu hose, guhera ku wa 16 kugeza kuri 21 Ugushyingo 2021 harimo gukingirwa abanyeshuri bo mu mashuri abanza, ayisumbuye na kaminuza bagejeje igihe.
Iti “Abazakingirwa ni abafite imyaka 18 kuzamura. Abaganga bazajya babasanga ku bigo byabo cyangwa kaminuza zabo ndetse bakazajya babimenyeshwa mbere.”
Guverinoma y’u Rwanda iheruka gutangaza ko abarenga 50% by’abaturage bafite imyaka 18 kuzamura mu Rwanda bamaze kubona doze imwe y’urukingo rwa COVID-19.
Intego ni ugukingira 60% mu buryo bwuzuye mu mwaka wa 2022.
