Menu
Indimi

Mu mahanga

Inyeshyamba Za Tigray Zisubije Umujyi Ukomeye Muri Ethiopia

Yanditswe kuwa

Amakuru y’intambara ishyamiranyije Ingabo za Ethiopia (ENDF) n’inyeshyamba za Tigray People’s Liberation Front (TPLF) akomeje guteza urujijo ku cyerekezo urugamba ruganamo.

Nyuma y’igihe Ingabo za Leta zigamba ko zikomeje kwirukana TPLF mu mijyi myinshi, amakuru mashya yemeza ko abarwanyi ba Tigray bisubije umujyi wa Lalibela nyuma y’igihe kitagera ku byumweru bibiri ubohowe.

Ni umujyi wo mu majyaruguru y’agace ka Amhara, wemejwe nk’Umurage w’Isi kubera insengero zihaboneka zicukuye mu rutare, ku buryo hafatwa nk’ahantu hatagatifu kuri miliyoni nyinshi z’abakirisitu b’aba Orthodox.

Uyu mujyi ubamo insengero zifite amateka akomeye

Reuters yatangaje ko Umuvugizi wa Guverinoma Legesse Tulu atasubije ibibazo by’iki kinyamakuru ku bivugwa ko uwo mujyi wafashwe n’abarwanyi ba TPLF.

Umuvugizi wa TPLF, Getachew Reda, na we ntiyitabye telefoni y’icyo kinyamakuru ngo agire icyo atangaza ku bikomeje kuvugwa.

Kuba uwo mujyi wongeye gufatwa byanemejwe na AFP, nyuma yo kuvugana n’abatangabuhamya.

Umwe mu batanze amakuru yavuze ko abasirikare badasanzwe bo mu gace ka Amhara n’indi mitwe yitwaje intwaro bafatanya ku ruhande rw’ingabo za Leta, batangiye kuba muri Lalibela mu ijoro ryo kuri uyu wa Gatandatu.

Uwo watanze amakuru kuri telefoni yagize ati “Icyiciro cyabo cya nyuma cyahavuye muri iki gitondo. Nijoro twumvise amasasu avugira kure, ariko ingabo za Tigray zongeye gufata Lalibela nta sasu ryongeye kuvugira mu mujyi.”

Ingabo zishamikiye kuri TPLF zafashe uwo mujyi bwa mbere muri Kanama.

Gusa ku wa 1 Ukuboza nibwo ingabo za Ethiopia hamwe n’iz’agace ka Amhara bisubije uwo mujyi.

Ni imwe mu ntambwe yari itewe mu guhangana na TPLF yari ikomeje kuvuga ko ishaka gukomeza urugendo ikagera mu murwa mukuru Addis Ababa.

Umutangabuhamya wa kabiri we yabwiye Reuters ko kuri iki cyumweru ko abaturage batangiye guhunga umujyi wa Lalibela.

Ati “Twagize ubwoba, ntabwo twigeze dutekereza ko ibi byabaho. Ubu abarwanyi ba TPLF barimo kugenzura umujyi bambaye impuzankano yabo.”

Urugamba rwo muri Ethiopia ruyobowe na Minisitiri w’Intebe Abiy Ahmed ubwe. Kuva yajya mu ntambara ingabo za Leta zagiye zitangaza ko zisubije uduce twinshi, ariko TPLF ikavuga ko itirukanywe muri utwo duce, ahubwo igenda ituvamo kubera amayeri ya gisirikare.

Iyi ntambara imaze umwaka wose imaze kugwamo ibihumbi by’abasivili, miliyoni nyinshi z’abaturage bavuye mu byabo ndetse abagera kuri miliyoni 9 bakeneye ubutabazi bw’inkunga z’ibiribwa.

 

Tanga igitekerezo

Tanga igitekerezo

Your email address will not be published.

Advertisement

English Version

Advertisement
WeCreativez WhatsApp Support
Mutwandikire turabasubiza
Twandikire