Guverinoma ya Israel, guhera kuri iki Cyumweru yemereye abantu igihe batari mu nyubako, kutambara agapfukamunwa. Ni ingamba nshya zigamije gusubiza ubuzima uko bwahoze, nyuma y’ibihe bikomeye by’icyorezo cya COVID-19.
Ni icyemezo cyatangiye kubahirizwa mu gihe Israel iza imbere ku isi mu gukingira icyo cyorezo, ku buryo uburwayi bwa COVID-19 bwagabanyutse cyane mu gihugu.
Minisiteri y’Ubuzima yatangaje ko abantu miliyoni 5.3 – ni ukuvuga hejuru ya kimwe ya kabiri cya miliyoni 9.3 batuye Israel – bamaze guhabwa urukingo rwa mbere rwa COVID-19. Abarenga miliyoni 4.9 bamaze guhabwa inkingo ebyiri ziteganywa.
Amabwiriza mashya yatangajwe ku wa Gatatu ubwo hizihizwaga imyaka 73 y’ubwigenge bwa Israel. Muri uwo muhango hari hatumiwemo umuyobozi mukuru w’uruganda rukora inkingo rwa Pfizer, Albert Bourla.
Amabwiriza mashya avuga ko nubwo igihe abantu bari hanze bashobora kutambara agapfukamunwa, ari itegeko kukambara igihe bari mu nzu ihurirwamo n’abantu benshi. No hanze ababishaka bashobora kukambara.
Iryo bwiriza rishya ryajyanye no kuba amashuri yose yafunguwe mu buryo busanzwe, havanwaho uburyo abanyeshuri wasangaga biga ari bake.
Israel inatangaza ko mu kwezi gutaha ibikorwa byose bizafungurwa, igihe cyose nta kibazo cy’unbwandu bushya cyaba kigaragaye.
Ku wa Gatanu abantu 105 basanzwemo COVID-19, ndetse abanya-Israel 202 bari barembye kubera iyo ndwara. Ni mu gihe abantu bose bagifite COVID-19 mu mubiri ari 2586, abishwe n’iki cyorezo ni 6315.
Umuyobozi Mukuru muri Minisiteri y’Ubuzima Chezy Levy yavuze ko imibare iri hasi y’ubwandu idakwiye gutuma abantu birara nk’aho nta kibazo kigihari.
Ati “Hari igabanyuka rikomeye mu bicwa n’iyi ndwara, ariko inama yanjye ni uko ahantu hose abantu begeranye bakwiye kwambara agapfukamunwa n’amazuru. Tugomba kwitwararika kugira ngo tudahungabanya intambwe zari zimaze guterwa.”
Yavuze ko hari ibikeneye gukorwa kuko 20% by’abarimu batakingiwe kimwe n’abana bari munsi y’imyaka 16, bityo hashobora kuba ikibazo ku buryo ari ukwitwararika.
Levy yavuze ko gukingira abantu bafite hagati y’imyaka 12- 15 bizatangira mu kwezi gutaha.
Mu gihe ibihugu byinshi bikomeje guhura n’ibibazo byo kubona inkingo za COVID-19, Israel yabonye nyinshi cyane za Pfizer/BioNTech, nyuma y’amasezerano impande zombi zagiranye, Israel ikemera kuzaha icyo kigo amakuru yose ajyanye n’imikorere y’urukingo cyakoze.
Izi nkingo zamaze kwemeza ko nubwo zidashobora kurinda umuntu kwandura virus itera COVID-19, zimurinda kuremba 100%.
