Inzego zishinzwe kugenzura imiti muri Leta Zunze Ubumwe za Amerika, zemeje ko nyuma y’isuzuma zakoze, zasanze urukingo rwa Covid-19 rwa Johnson & Johnson rushobora gutanga umusaruro ufatika, kandi rugaterwa umuntu inshuro imwe gusa.
Ni igikorwa cyatanze icyizere ko rushobora kuba urukingo rwa gatatu rwemejwe, rugatangira guhabwa abantu muri Amerika, nyuma y’inkingo za Pfizer/ BioNTech na Moderna.
Urwo rukingo kurukoresha byaba bihendutse kurushaho, rukabikwa muri firigo zisanzwe z’inkingo, bitandukanye n’iza za Pfizer na Moderna zisaba ibyuma bikonjesha ku rwego rwo hejuru. Nk’urukingo rwa Pfizer rubikwa mu bukonje buhera kuri dogere celcius -70.
Byongeye, urukingo rwa Johnson & Johnson rwakozwe ku bufatanye n’ikigo Janssen Pharmaceuticals, ruzaba ruterwa umuntu inshuro imwe gusa bikaba birangiye.
Ni mu gihe inkingo za Moderna na Pfizer/BioNTech zisaba ko umuntu aziterwa inshuro ebyiri, hagati hakajyamo intera y’ibyumweru bibiri cyangwa bitatu.
Imibare y’igerageza yerekanye ko nibura urukingo rwa Johnson & Johnson rushobora kurinda umuntu kuremba hejuru ya 85%, rukanamurinda ku gipimo cya 66% ubaze n’ibibazo bito bishobora kubaho. Rutangira gukora neza nyuma y’iminsi 28 rutanzwe.
Biteganyijwe ko itsinda ryigenga ry’abahanga rizakorana kuri uyu wa Gatanu, ari naryo rizemeza niba Ikigo Gishinzwe Ibiribwa n’Imiti muri Amerika, US FDA, cyatanga uburenganzira urwo rukingo rugatangira guhabwa abantu ku mugaragaro.
Biteganywa ko nirwemezwa, hari inkingo za Johnson & Johnson nibura miliyoni eshatu zizahita zitangira guhabwa abaturage mu cyumweru gitaha.
Na mbere y’uko uru rukongo rwemezwa, u Bwongereza bwamaze gutumizaho inkingo miliyoni 30, Leta Zunze Ubumwe za Amerika zatumijeho miliyoni 100, naho Canada yatumije miliyoni 38.
Leta Zunze Ubumwe za Amerika iza imbere ku isi mu kwibasirwa na COVID-19, kuko hamaze kwandura ari abaturage miliyoni 28.9, mu gihe abamaze gupfa basaga ibihumbi 518.
Urukingo rwa Johnson & Johnson rukozwe mu buryo busanzwe, hifashishijwe virus ifite intege nke cyangwa yapfuye (adenovirus), idashobora gutera umuntu uburwayi.
Iyo umuntu atewe urwo rukingo, ubwirinzi bw’umubiri bubona amakuru ahagije kuri virus ya SARS-CoV-2, ari nayo itera COVID-19, ku buryo iyo umuntu ayanduye, umubiri uba warubatse uburyo bwo kuyirwanya.
Ni mu gihe inkingo za Pfizer/BioNTech na Moderna zakoranywe ikoranabuhanga rishya, rishingiye ku karemangingo kazwi nka Messenger RNA cyangwa mRNA.
Ziha umubiri ubushobozi bwo gutahura ya virusi ndetse ukubaka ubushobozi bwo kuyirwanya.
