Perezida Paul Kagame byitezwe ko ageza ijambo ku nama ya Komite Nyobozi y’Ishyirahamwe ry’Umupira w’amaguru muri Afurika, CAF, iteraniye i Kigali kuri uyu wa Gatandatu.

Ni inama yitabiriwe n’abantu bakomeye barimo Perezida wa CAF Dr Patrice Motsepe, Perezida wa FIFA Gianni Infantino n’umuyobozi ushinzwe iterambere ry’umupira w’amaguru muri iryo shyirahamwe, Arsene Wenger, wanatoje Arsenal F.C. yo mu Bwongereza.

CAF yatangaje ko Perezida Kagame na Minisitiri wa Siporo Munyangaju Aurore Mimosa, baza kugeza ijambo kuri iyi nama ya Komite Nyobozi ya CAF.

Ku murongo w’ibyigwa muri iyi nama hariho irushanwa ry’amashuri y’umupira w’amaguru muri Afurika, Pan-African Schools Football Championship, amasezerano ajyanye n’imisifurire hagati ya CAF na FIFA n’umushinga wa miliyari $1 ujyanye n’iterambere ry’ibikorwaremezo, uhuriweho na FIFA na CAF.

Mu bindi byigwa harimo kuganira ku ngengabihe y’imikino y’imyaka ya 2022-2024 n’imbogamizi zijyanye no gupimisha abakinnyi COVID-19 mbere y’imikino.

Mbere y’iyi nama, Dr Motsepe yagiranye inama n’abayobozi b’amashyirahamwe y’umupira w’amaguru ahuza uturere dutandukanye muri Afurika, yabaye kuri uyu wa Kane muri Kigali Serena Hotel.

Utwo turere turimo CECAFA, COSAFA, UNAF, UNIFFAC, WAFU A, WAFU B.

🔴 LIVE: SE M. Paul Kagame, Président de la République du Rwanda. Assisté de Mme Aurore Mimosa Munyangaju, Ministre des sports prononcera une allocution spéciale devant le Comité exécutif de la CAF ce samedi 15 mai 2021. https://t.co/wK87gWKs9n

— CAF Media (@CAF_Media) May 15, 2021