Perezida Paul Kagame yayoboye inama y’abaminisitiri yitezweho kwemeza ingamba nshya zo kurwanya icyorezo cya COVID-19, zisimbura izimaze ibyumweru bibiri zubahirizwa.
Ingamba zimaze iminsi zigenderwaho zemejwe na Guverinoma ku wa 29 Werurwe 2020, ubwo ingendo zasubukurwaga mu turere twa Bugesera, Nyanza na Gisagara.
Abaturage bo mu turere turere dutandatu two mu Ntara y’Amajyepfo twa Ruhango, Nyanza, Huye, Gisagara, Nyaruguru na Nyamagabe bo bategetswe ko bagomba kuba bari mu rugo hagati ya saa moya z’ijoro na saa kumi za mu gitondo.
Icyo gihe imodoka rusange zategetswe gutwara abagenzi 50% ugereranyije n’ubushobozi bwazo, bavuye kuri 75%.
Iyi nama kandi iteranye mu gihe imirenge itandatu yo mu turere twa Huye, Gisagara na Nyaruguru mu Ntara y’Amajyepfo iheruka gushyirwa muri Guma mu rugo y’ibyumweru bitatu, hagamijwe guhagarika ubwiyongere bukabije bw’ubwandu bwa COVID-19.
Iyo mirenge ni Ruhashya na Rwaniro yo mu Karere ka Huye, Gikonko, Kansi na Mamba yo mu Karere ka Gisagara n’Umurenge wa Ruramba wo mu Karere ka Nyaruguru.
Kugeza ubu abamaze gusangwamo COVID-19 mu Rwanda ni 23.603, abakize ni 90.6%.
