Ubwo yagezaga ijambo ku bandi banyacyubahiro mu nama yo kwishimira ko hashize umwaka abatuye Isi batangiye ubufatanye mu kurwanya COVID-19 binyuze mu gusaranganya inkingo, Perezida Kagame yavuze ko gukomeza muri uyu mujyo bikiri ngombwa.
Iriya nama yari yitabiriwe n’abandi banyacyubahiro barimo n’Umunyamabanga mukuru w’Ishami ry’Umuryango w’abibumbye rishinzwe ubuzima ku isi, Dr Tedros Adhanom Ghebreyesus.
Yavuze ko mu bihugu byinshi bikennye, uburyo bwo gufashanya kugira ngo ibikoresho byo kwirinda kiriya cyorezo bwiswe Access to COVOD-19 Tools ( the ACT-Accelerator) bugere kuri benshi bwatanze umusanzu munini wo guhangana nacyo.
Ubu buryo bwatangijwe n’Ishami ry’Umuryango wabibumbye rishinzwe ubuzima icyo gihe hakaba hari muri Mata, 2020.
Abahanga bakorana muri iyi gahunda bakora bagamije kureba uko hahangwa uburyo n’ibikoresho bishya bwo guhangana na COVID-19.
Ikindi kigamijwe muri ubu buryo ni ukureba uko inkingo za COVID-19 zagera ku bantu benshi kandi bidahenze Leta zikennye.
Perezida Kagame yabwiye abari bamuteze amatwi ko ibikorwa byo gukumira, guhangana no gukingira COVID-19 bigomba gukomeza gushyirwamo imbaraga kuko kiriya cyorezo nacyo gihindura imiterere n’imikorere yacyo.
Ati: “ Muri iki gihe nsanga hakenewe gukorwa byinshi kugira ngo abatuye isi bakomeze ubufatanye mu guhangana na COVID-19 kuko nayo ihindagurika mu buryo butari bwitezwe.”
Kagame yavuze ko ibikorwa mu guhangana na kiriya cyorezo bigomba kwibanda ku kugabanya ikiguzi cy’ibisabwa mu kuyirwanya kandi ibikoresho byo kuyirwanya bikagezwa ku bantu benshi.
Yavuze ko Afurika ikwiye kubifashwamo kurusha ahandi ku isi kuko ikiri inyuma cyane haba mu gukora inkingo cyangwa mu kubona izakorewe ahandi ariko ikazibona zitayihenze cyane.
Avuga ko n’ubwo Afurika yatangiye umugambi wo gushinga inganda zo gukora urukingo rwa COVID-19 ariko ikeneye guterwa ingabo mu bitugu n’andi mahanga.
Ku isi kugeza ubu harabarurwa abantu 146,236,400 banduye kiriya cyorezo.
Muri bo abagera kuri 3,099,461 cyarabahitanye ariko abandi 124,022,653 barayikira.
Mu Rwanda abantu 24, 459 nibo bamaze kucyandura, muri bo cyahitanye Abanyarwanda 328, hakira abandi 22, 696.
