Umunyakenyakazi Lupita Nyong’o ukina filimi akaba yaregukanyeigihembo cya Oscar, yatangaje ko yashoye mu ikipe ya Basketball ikomeye muri Kenya yitwa Nairobi City Thunder.
Kuri Instagram ni ho yatangarije ubwo bushabitsi bwe, akaba yahashyize amashusho ye yambaye imyambaro ya Nairobi City Thunder ndetse avuga ko yishimiye kuba umushoramari w’iyi kipe kandi ko yishimiye kuyishyigikira.
Nairobi City Thunder ni ikipe yabaye iya mbere yo muri Kenya mu kubona itike yo gukina Basketball Africa League (BAL).
Mu mwaka wa 2025, yanakinnye imikino yayo ya mbere ya BAL i Kigali, aho yatsinze umukino umwe.
Nyong’o azwi cyane kubera uruhare rwe muri filime nka 12 Years a Slave, yamuhesheje Oscar, ndetse na Black Panther.
Kwinjira kwe mu bashoramari ba Nairobi City Thunder bitumye aba umwe mu bantu bazwi ku rwego mpuzamahanga bafite uruhare mu iterambere ry’iyi kipe.
Iyi nkuru yatangajwe kandi mu gihe Nairobi City Thunder yiteguraga gukina imikino ya nyuma ya Kenya National Basketball League (KNBL), aho yari guhura na Kenya Ports Authority (KPA).
