Menu
Indimi
Advert

Imikino

Mashami Yongerewe Amasezerano Y’Umwaka Umwe Atoza Amavubi

Yanditswe kuwa

Mashami Vincent waherukaga gusoza amasezerano nk’umutoza mukuru w’ikipe y’igihugu Amavubi yongerewe umwaka umwe, ahabwa inshingano zo kwitwara neza mu mikino yo gushaka itike y’Igikombe cya Afurika cyo mu 2021 n’icy’Isi kizabera muri Qatar mu 2022.

Mashami atoza Ikipe y’Igihugu y’umupira w’amaguru kuva muri Kanama 2018 ubwo yasimburaga Antoine Hey. Nta muntu bari bahataniye uyu mwanya kuri iyi nshuro.

Amakuru yizewe avuga ko mbere yo guhabwa amasezerano y’umwaka umwe, Ishyirahamwe ry’Umupira w’Amaguru mu Rwanda ryari ryamusabye gusinya amasezerano y’ukwezi kumwe ngo abanze atoze umukino wa Mozambique na Cameroon ariko arabyanga, asaba ko niba adasinyishijwe umwaka wuzuye hashakwa undi.

Amakuru aturuka muri FERWAFA na Minisiteri ya siporo yemeza ko Mashami yamaze guhabwa amasezerano y’umwaka umwe, ndetse ko bitangazwa mu masaha make.

Ku wa Gatatu w’iki cyumweru, Minisitiri wa Siporo Munyangaju Aurore Mimosa yari yatangarije kuri televiziyo y’igihugu ko “bitarenze ku wa Gatanu, umutoza w’Ikipe y’Igihugu Amavubi azaba yatangajwe.”

Kuva muri Kanama 2018 ubwo Mashami yatangiraga gutoza Amavubi, yatoje imikino 23 atsinda itanu, anganya 11 mu gihe yatsinzwe irindwi. Ni imibare ariko idashimishije muri rusange kuko bivuze ko yatsinze 21.7%, anganya 47.8%, atsindwa 30.4%.

Mashami aheruka gufasha ikipe y’igihugu kugera muri kimwe cya kane cy’irushanwa nyafurika ry’amakipe y’ibihugu, agizwe n’abakina muri za shampiyona z’imbere mu bihugu, CHAN, ryabereye muri Cameroon.

Tanga igitekerezo

Tanga igitekerezo

Your email address will not be published. Required fields are marked *

Advertisement
Advertisement
Advertisement
Advertisement
Advertisement