Minisiteri y’ubuzima ivuga ko Abanyarwanda bagombye kwitwararira mu kwirinda COVID-19 kuko bicyekwa ko hari ubwandu bwayo bushya bwageze mu Rwanda.
Minisitiri w’ubuzima Dr Ngamije Daniel yabwiye RBA ko Abanyarwanda bakwiye kongera imbaraga mu kwirinda kiriya cyorezo kuko imibare imaze iminsi itangazwa na RBC yerekana ko ubwandu bwayo buri henshi kandi buri kwiyongera.
Ngo biragaragaza ko hari ubwandu bushya bwayo kandi bufite ‘ubukana budasanzwe.’
Mu minsi irindwi abantu ibihumbi bitandatu bamaze kwandura iki cyorezo.
Bamwe mu baturage basanze ibyiza ari kujya kwipimisha ku bigo nderabuzima baturiye kugira ngo bamenye uko bahagaze.
Kugeza ubu ubwitabire bw’abagana ibigo nderabuzima bumaze kurenga ubushobozi bwabwo, kuko ababigana basuzumwa ku buntu.
Umwe mu bahanga mu by’ubuvuzi witwa Prof.Léon Mutesa avuga ko virusi ya COVID-19 ishobora kwihinduranya inshuro zirenga 100 mu minsi itatu.
Kwirinda kuyirwara niwo muti mwiza nk’uko abaganga babivuga.
Icyorezo COVID-19 giherutse kwica Umunyarwanda wo mu Karere ka Nyamasheke.
Hari hashize igihe kirekire imibare y’abandura iki cyorezo iri hasi ndetse nta muntu cyaherukaga kwica.
Minisiteri y’Ubuzima mu minsi ine ishize yatangaje ko mu Rwanda habonetse abanduye kiriya cyorezo bashya 50, bakaba babonetse mu bantu 3.418 bapimwe.
Abenshi mu bandura ni abatuye mu Mujyi wa Kigali .
Umuturage w’i Nyamasheke wapfuye yari umusaza w’imyaka 64 y’amavuko.
Kugeza ubu abantu bamaze kugwa mu Rwanda bazize iki cyorezo ni abantu 1,460.
Mu minsi ishize, Umunyamabanga wa Leta muri Minisiteri y’ubuzima Dr Tharcisse Mpunga aherutse kubwara Radio Rwanda ko abantu badohotse mu gukurikiza ingamba zo kwirinda COVID-19 kandi ngo ibi biri mubiri kuyitiza umurindi.
Abajijwe niba bishoboka ko kwambara agapfukamunwa byazongera kugirwa itegeko, Dr Mpunga yavuze ko n’ubundi katakuweho burundu ahubwo ko buri wese agomba gushyira mu gaciro akarengera ubuzima bwe, akakambara bitewe n’ahantu hari abantu benshi agiye kujya.
